Episode 53
Training
Sikandar apne room se neeche utra aur seedha Training Hall ki taraf chal pada. Adhara ne use bataya tha ke Suraj wahin uska intezar kar raha hai.
Raaste mein bohot se log uski taraf dekh rahe thay, lekin Sikandar ne sab ko ignore kiya.
Kuch hi dair baad, Sikandar Training Hall pohanch gaya.
“Kaafi arsay baad yahan aaya hoon,” Sikandar ne socha, lekin aglay hi lamhay uski nazar hall ke andar jama bheer par pari, jo jagah ko ghair mamooli tor par bhara hua bana rahi thi.
Ochyra University ke students — sirf Awakened hi nahi, balkay non-Awakened students bhi — sab yahan maujood thay, unke chehron par excitement saaf nazar aa rahi thi.
“Kya yahan koi event ho raha hai?” Sikandar ne dil mein socha, kyun ke Training Hall aam tor par kabhi itna crowded nahi hota.
Jab Sikandar andar gaya, to students ne uska chehra dekhte hi raasta bana diya.
Ab tak har koi Sikandar ko jaanta tha, chahe woh Awakened ho ya na ho. Woh Ochyra University ka fakhar tha — lekin unhein yeh nahi pata tha ke Sikandar ne lagbhag Faraday University shift hone ka faisla kar liya hai.
Sikandar ne bheer mein Suraj ko dhoondhna shuru kiya, ke tabhi kisi ki awaaz aayi:
“Dekha?! Phir jeet gaya! Oh my God, is ne to Fred ko bhi hara diya!”
Yeh sun kar Sikandar ne baen taraf dekha aur dekha ke Suraj arena ke andar khara tha.
Suraj ke gird students ka jhund laga hua tha. Is waqt woh ek ganje sar walay non-Awakened se muqabla kar raha tha.
Ganja shakhs Suraj ki defense todne ki puri koshish kar raha tha, lekin bekaar — Suraj ki defense pathar jaisi mazboot thi.
Sikandar ne notice kiya ke woh banda aam non-Awakened ki tarah sust nahi tha; lagta tha ke usne close-combat training le rakhi hai.
Suraj ne koi enhancement use nahi ki. Woh apni power ko opponent ke level par rakh kar, sirf skill-based brawl kar raha tha.
Aakhirkar Suraj ne aik zabardast kick maari, jo ganje bande ko sand arena se bahar le ja phainki.
“Next kaun hai?” Suraj ne muskurate hue kaha.
Suraj ne charon taraf dekha, lekin phir uski nazar Sikandar par jam gayi. Usne ungliyon se ishara kar ke Sikandar ko taunt kiya.
Lekin Sikandar ne seedha mana kar diya.
“Chalo, humein aur kaam hain,” Sikandar ne kaha.
Suraj ne aik mocking look diya. Woh Sikandar ke saath spar karna chahta tha — kyun ke Sikandar hi uska barabari ka muqabla tha — lekin Sikandar ke paas waqt nahi tha.
Suraj arena se jump kar ke bahar aaya aur Sikandar ke saath chal pada.
Dono jab Training Hall se bahar niklay, to students ki nazrein un par jami hui theen.
Suraj ki hand-to-hand dominance us waqt be-asar lag rahi thi jab logon ko pata chala ke woh Sikandar ka qareebi hai. University ka aik public secret ban chuka tha:
Sikandar ke aas paas walon se panga mat lo.
Bahar aakar Sikandar ne kaha, “Yeh address hai. Wahan jao aur Karan ko kehna ke tum use meri taraf se training do ge.”
Suraj ne phone par address dekha aur poocha, “Kis cheez par focus karoon?”
Sikandar ne jawab diya, “Main chahta hoon ke woh stealthy scouting aur information gathering seekhe. Woh ladka gifted hai — training mushkil nahi hogi.”
Suraj kuch poochna chahta tha, lekin Sikandar ne baat kaat di: “Khud dekh lena.”
Sab batane ke baad Sikandar jaane laga, kyun ke use Task Hall jana tha — lekin phir woh ruk gaya.
“Kya use sirf training par focus karna chahiye? Haan… yehi behtar hoga,” usne socha.
Woh wapas Suraj ke paas gaya jo abhi address dekh raha tha. “Aik aur favor pooch sakta hoon?”
Suraj hairan hua. “Agar mushkil hua to tumhein phir se military bhej doon ga,” usne mazaq kiya.
Sikandar halki si hansi hansa. “Adhara ko yaad hai? Uske liye dagger-wielding training routine bana do. Kabhi kabhi khud bhi train kar dena.”
Suraj ne kaha, “Theek hai — lekin is ke baad mujhe shehar ki sab se mehngi steak khilani ho gi.”
---
Suraj se alag hone ke baad, Sikandar Task Hall gaya aur aik mission liya.
Staff ko ajeeb laga ke Sikandar peak rank three missions le raha hai, lekin Sikandar apne tajurbe ke mutabiq kaam kar raha tha.
Mission tha: Kobold aur Blue Lizard ki horde ka khatma, jo aik level-four city par hamla kar rahi thi.
Yeh sirf peak rank three mission tha, is liye Sikandar ne andaza lagaya ke woh akela hi kaafi hoga.
Zyada high-rank missions is waqt us ke liye bohot khatarnaak thay.
Woh dheere dheere level up karna chahta tha aur apni Awakened skills ko polish karna chahta tha. Platchi ke liye jo plan uske dimagh mein tha, uske liye use aur strong hona zaroori tha.
“Adhara, main yeh mission akela karne ja raha hoon,” Sikandar ne kaha.
Adhara ki aankhein khul gayeen. “Itni achanak? Main thaki hui hoon lekin madad kar sakti hoon. Mujhe exclude mat karo.”
Sikandar ne kaha, “Aisa nahi hai. Tum daggers ki training kar rahi ho, hai na?”
Adhara ne sar hila diya.
“Suraj se seekho. Woh tumhare liye behtareen teacher hoga — brute Supernaturals se larna baad mein.”
Asal wajah sirf yeh nahi thi ke Sikandar Adhara ko strong banana chahta tha — balkay woh khud peak rank three missions spam kar ke tez leveling karna chahta tha.
Adhara aur Karan abhi utne strong nahi thay. Behtar tha ke woh pehle apni skills par kaam karein.
Aane wale kisi barray event ka andesha Sikandar ke dimagh mein tha — aur woh chahta tha ke sab tayyar hon.
Kuch behas ke baad, Adhara maan gayi.
Woh tayyar hui aur Sikandar ke kehne par Suraj ke ghar chali gayi. Sikandar ne use khaas taur par kaha ke mehnat se training kare, kyun ke use uski zaroorat hogi.
Yeh sun kar Adhara ke dil mein khushi chhup gayi.
---
Sikandar bed par lait gaya. Mission par nikalne se pehle woh shop scan karna chahta tha.
Kaafi dair scroll karne ke baad bhi use koi khaas spell pasand nahi aayi.
Aakhirkar usne Adhara aur Karan ke liye breathing techniques khareed li:
• Swift Gale Breathing Technique
• Deluge Shadow Breathing Technique
Dono mid-rank techniques theen.
Apne liye Sikandar ne aik high-rank technique li:
Bulwark of Supernatural Breathing Technique
Yeh Basic Moon Technique category se belong karti thi, jis ka matlab tha ke Sikandar ise har raat use kar sakta tha.
Yeh breathing technique user ko anti-Supernatural aura deti hai, jo saamne wale Supernatural ki power 5% tak kam kar deti hai, aur saath hi 10,000 EXP per hour bhi provide karti hai.
Sikandar ko yeh breathing technique bohat pasand aati hai. Yeh use Supernatural ke khilaaf ek bohat bara edge dene wali thi.
Aur jab yeh technique uski Alpha Intimidation ke saath combine hoti hai, to saamne wale Supernatural ki power par total 35% tak ka decrease ho jata hai!
Is breathing technique ki sab se khaas baat yeh hai ke target ke mental stats kam honay ki koi shart nahi.
Chahe saamne wala kitna hi powerful Supernatural kyun na ho, yeh technique har haal mein asar karegi.
Is sab ke liye Sikandar ne 12 hazaar gold kharch kiye, lekin use zara si bhi regret mehsoos nahi hui.
Is ke baad Sikandar ne apne kapray aur zaroori samaan pack kiya, aur mission par nikalne se pehle ek kaam aur karna tha.
Woh us ghar gaya jo usne khareeda tha, taake breathing technique Adhara aur Karan ko de sake.
Uska irada tha ke dono foran is technique ko seekhna shuru karein, taake unki growth aur tez ho jaye.
Jab Sikandar wahan pohancha, to usne dekha ke Suraj, Karan ko training de raha hai.
Adhara wahan maujood nahi thi.
Suraj ne bataya ke Adhara training ground gayi hui hai, jahan woh training routine test kar rahi hai jo Suraj ne use diya tha.
Woh kaafi dair baad hi wapas aane wali thi.
“Karan , idhar aao,” Sikandar ne kaha, aur use ishara kiya ke doosray kamray mein aaye.
Suraj ne muskura kar Sikandar ki taraf dekha,
“Class chal rahi hai, mere student ko disturb mat karo,”
usne mazaak mein kaha.
Yeh sun kar Sikandar bilkul be-bas mehsoos karne laga.
Woh chahta tha ke bas book yahin rakh kar chala jaye,
lekin use darr tha ke Suraj use padh lega —
aur Suraj ka curiosity ka shauk use acchi tarah pata tha.
Sikandar ne kuch dair socha, phir kaha,
“Main mission par ja raha hoon, baad mein miltay hain.”
Lekin jaise hi woh nikalne laga, Suraj ne use awaaz di,
“Aur woh doosra bachcha? Kya main use bhi sikhaoon?”
Sikandar ne face-palm kiya —
woh Ryze ko bilkul bhool chuka tha.
“Filhaal use bhi tum Karan ke saath hi rehne do,”
Sikandar ne kaha, aur phir ghar se nikal gaya.
---
Meanwhile… Black Tiger Guild ke office mein
Duncan apni cigarette jalata hai.
Uska hamesha ka gusse aur sakhti bhara chehra aaj kaafi relaxed, balkeh khush lag raha tha.
Woh lighter ke saath khel raha tha —
saaf lag raha tha ke uska mood bohat acha hai.
“President, hum ne ek aur group ko apni side mein le liya hai. Zyada dair nahi lagegi jab woh khud parley ke liye aayenge,”
ek aadmi side se bola.
Yeh sun kar Duncan zor se hans pada.
Sullivan Family ke business ko palat dene ki kamyabi ne uske chehre par jeet ki muskurahat la di.
Sullivan ne uske kai cash deposits par hamlay kiye thay,
jis wajah se Duncan aag-bagula tha.
Lekin ab…
baazi palat chuki thi.
Platchi Family ke paas Awakened ki bohat bari tadaad thi,
aur upar se Black Tiger Guild ke members bhi saath thay,
jis ne Sullivan Family ko poori tarah dabaa diya.
Yeh sab kuch chupke chupke ho raha tha.
Kisi bhi legal authority ko is ka ilm nahi tha.
Sullivan aur Platchi ke darmiyan chalne wali yeh shadow war poori tarah se raaz mein thi.
“White Assassins ke mamlay mein FAA ko sambhalna, aur Sullivan ke khilaaf yeh jeet — sab aap ki wajah se hua hai. Aman qareeb hai,”
aadmi ne Duncan ki tareef ki.
Duncan ne fakhr se muskurate hue poocha,
“Sikandar ke liye bheja gaya mercenary ka kya bana?”
Woh smoke phoonkta hua us aadmi ko ghoorne laga,
jaise use yaqeen ho ke kaam ho chuka hoga.
Lekin saamne wala hichkichane laga,
aur ghabrahat saaf nazar aane lagi.
Duncan ka chehra andhera ho gaya.
“Kitne bheje thay? Maine kaha tha agar mid-rank five nahi hai to deal mat lena.”
“Sir… sirf mid-rank four tha…”
aadmi ne dheemi awaaz mein kaha.
Duncan ne haath aapas mein jor liye.
“Zyada powerful Awakened kyun nahi bheje gaye?”
“Anarchy Mercenaries ka kehna tha ke aik bachay ke liye strong Awakened zaya karna bewaqoofi hai. Unka kehna tha Sikandar sirf early rank four hai, is liye mid-rank four kaafi hai,”
aadmi ne wazahat di.
Duncan ka jism jhatkay se seedha ho gaya.
“Leon ko bulao. Abhi.”
Kuch hi dair mein Leon kamray mein aaya aur Duncan ke samne ghutnon par baith gaya.
Duncan apni kursi se utha aur dheere dheere Leon ki taraf badha.
Har qadam Leon ke liye maut jaisa lag raha tha.
Duncan ne uske samne jhuk kar cigarette pakray kaha,
“Itna asaan kaam bhi fail kar diya? Mid-rank five walon ko kyo nahi baej sake?”
Leon chup raha.
Uske maathe par paseena behne laga.
“Main tum se baat kar raha hoon,”
Duncan ne cigarette ke jale hue hisay ko Leon ke seene par chubho diya.
Phir woh garaj kar bola:
“Tum ne kaha tha kaam ho jaye ga! Aur aaj Sikandar zinda ghoom raha hai jab ke MERA BETA… US KE HAATHON MITTI MEIN MIL CHUKA HAI!”
Duncan ne Leon ko zor se laat maari,
aur woh deewar se ja takraya.
Kapray seedhay karte hue Duncan ne kaha,
“Ab tum Platchi ka hissa nahi ho.”
Leon ne sar uthaya.
Duncan usay meaningful muskurahat ke saath dekh raha tha.
“Ji President! Main khud Sikandar ko maar kar uska sar aap ke paas laaunga!”
“Yahi jazba chahiye,”
Duncan ne kursi par baithtay hue kaha.
Phir ungli utha kar bola:
“Lekin yaad rakhna… agar fail hue… to tum apni family ke saath mere bete ka saath doge.”
---
Adhara is waqt Ochyra University ke Training Hall ke andar maujood thi. Uske jism par pasina is baat ka saboot tha ke woh apni skills par be-inteha mehnat kar rahi hai.
Swish! Swish!
Uske haath mein pakra hua dagger hawa mein naach raha tha, jab woh usey baen aur daen zor se ghumati.
Uske zehan mein Suraj ka diya hua routine ghoom raha tha.
Suraj ne kaha tha ke pehle usey apne saamne dagger swing karna hoga, phir jhat se apna jism ghoomate hue peeche ki taraf tez waar karna hoga.
Suraj ne saaf alfaaz mein kaha tha:
“Ye dagger-wielding ki bunyaad hai. Agar tum itna bhi asaani se nahi kar sakti, to phir tum dagger ke liye bani hi nahi.”
Is ke baad Suraj ne Adhara ko ek hafta diya tha.
Agar ek hafte mein woh dagger ko apne jism ka hissa bana kar asaani se chala na saki, to usey kisi aur weapon ki taraf jaana chahiye.
Yahi wajah thi ke Adhara poori jaan laga rahi thi.
Usne apne aap se qasam khayi thi ke do ya teen din ke andar hi is movement ko master karegi—taake yeh saabit ho sake ke woh waqai dagger uthana deserve karti hai.
Training Hall mein maujood kai students uski taraf dekh rahe thay.
Purple Fire aankhon ko jamaa dene wali thi.
“Uska element evolve ho gaya kya?”
“Kitni khofnaak aag hai… iski garmi mehsoos ho rahi hai.”
“Meri fire to dheemi par rahi hai… jaise Adhara ki aag se darr rahi ho!”
Students aapas mein dheemi awaaz mein baatein kar rahe thay.
Adhara ki fire itni domineering thi ke baqi sab elements uske saamne kamzor lag rahe thay.
Dagger training ke saath saath, Adhara koshish kar rahi thi ke apni nai purple fire ko bilkul perfect tareeqe se dagger ke saath mila sake.
Agar woh kamyaab ho jaati, to uske attacks kai guna zyada lethal ho jaate.
Uska dagger purple roshni se chamak utha.
Woh uchli aur aise slash kiya jaise koi ballet dancer stage par performance de rahi ho—aur saari nazrein us par tiki hui thin.
Zameen jahan jahan uska waar laga, kaali jali hui reh gayi.
Purple fire itni tez thi ke farsh bhi bardasht na kar saka.
“Abhi bhi is aag ki aadat nahi hui… mujhe aur tez hona hoga,”
Adhara ne dil hi dil mein socha.
Uske jism se nikalti hui intense purple heat ne aas paas training karne walon ko peeche hatne par majboor kar diya.
Garmi itni thi ke logon ki skin jalne jaisi mehsoos ho rahi thi.
Yeh element baqi students ke elements se bilkul alag level par tha.
SWOOSH!
Purple fire ne sirf dagger ko hi nahi, balkay Adhara ke poore jism ko lapet mein le liya, aur woh phir se training mein jut gayi—poori koshish ke saath ke apne naye element se waqif ho sake.
Pichle waqia se, jab uska mana khatam ho gaya tha, Adhara ko ek baat samajh aa gayi thi.
Is element ko samajhne ke liye usey aur waqt chahiye tha.
Is baar ka incident uski ghalti nahi tha…
Lekin agar doosri baar bhi aisa hua, to woh sirf uski apni ghalti hogi.
Aur Adhara yeh bilkul nahi chahti thi.
Woh dobara us ghalti ko hone se roke gi—har haal mein.
Adhara ki aankhen purple roshni se chamak utheen jab usne apne saamne kharay dummy ko dekha.
Yeh ek normal dummy tha—Faraday University ke un advanced dummies jaisa nahi jo Awakened ke power level ke mutabiq adjust ho jaate thay.
Usne dagger ko tayar kiya aur zor se cheekhi:
“Hyaaah!!”
Purple fire ka ek tez slash dummy ki taraf gaya.
BOOM!
Dummy aik hi waar mein phat gaya.
Jism raakh ban gaya, aur purple fire zameen par phail gayi.
Us aag ko dekhte hue, Adhara ne ek ajeeb si connection mehsoos ki.
Jaise yeh purple fire us se aur energy maang rahi ho…
Jaise woh zinda ho.
Jaise uski apni soch ho.
Adhara ne aankhen tangein aur control ki koshish ki.
“BURN!!”
BOOM!
Aag aur bhi zyada phat padi.
Uske hukm par purple fire aur zyada rampant ho gayi, jaise Adhara ke alfaaz ne usey fuel de diya ho.
Is manzar ko dekh kar Adhara ne apna haath dekha, aankhon mein samajh ki chamak thi.
“Yeh aag… meri feelings se strong hoti hai.
Jitni zyada emotion main is mein daalti hoon, utni hi yeh powerful ho jaati hai.”
Aakhirkaar Adhara ne purple fire ki innate property samajh li.
Woh saaf dekh sakti thi ke baingani aag uske jism ke gird maujood emotion aura ko absorb kar rahi hai.
Yeh uski soch se bhi zyada khofnaak thi.
Din dhal gaya… aur raat aa gayi.
Lekin Adhara ruki nahi.
Woh lagataar training karti rahi, aur uska jism dheere dheere is purple fire ka aadhi hota chala gaya.
“Mujhe zyada thakaan mehsoos hi nahi ho rahi…
Kya yeh Werewolf banne ka asar hai?”
Usne socha.
Raat ke qareeb aadhi hone ke bawajood, usse lag raha tha ke woh bina ruke subah tak training kar sakti hai.
Yeh jaan kar Adhara hairaan reh gayi ke uski stamina ya to bohot barh chuki hai, ya phir stamina recovery bohot tez ho gayi hai.
Usey nahi pata kaun si baat sach hai—
Lekin ek baat clear thi: woh thaki nahi thi.
Jab Adhara dobara training shuru karne hi wali thi—
Clap! Clap! Clap!
Uske peeche se taaliyon ki awaaz aayi.
Woh palti…
Aur usne Hera ko dekha jo muskurate hue taaliyan bajati hui uski taraf aa rahi thi.
Hera apna usual Lecturer outfit pehne hui thi, lekin Adhara mehsoos kar sakti thi ke usmein kuch badlaav tha.
Uske jism se nikalti fire mana pehle se zyada strong thi—
Agar thora aur meditation kar le, to woh Rank Five ke qareeb pohanch sakti thi.
“Ms. Hera? Aap yahan kya kar rahi hain?”
Adhara ne poocha. Woh dono zyada close nahi thin.
Hera ne purple fire ki taraf nazar daali aur dheemi awaaz mein kaha,
“Yeh bohot powerful element hai…
Kya tumhara element evolve ho gaya hai?”
Adhara ne abhi tak jalti hui purple fire ko dekha, phir apna haath lehra kar use bujha diya.
“Haan, maine apna element evolve kar liya… Sikandar ki madad se,” us ne sakoon se kaha.
Sikandar ka naam suntay hi Hera ki bhonwen uth gayin, aur us ka chehra foran pechida ho gaya.
Adhara ne yeh foran notice kar liya. Us ne Hera ki emotion aura dekhi jo gray ho chuki thi — jo is baat ka ishara thi ke Hera ghabrahat, fikar ya confusion ka shikar hai.
“Kya tum mere saath South Wing Park chalogi?” Hera ne poocha.
Adhara ka pehla khayal mana karne ka tha, kyun ke us ki training chal rahi thi.
Lekin jab us ne Hera ki taraf dekha, to use mehsoos hua ke Hera ke dil mein koi gehri baat hai jo woh chhupana chahti hai.
‘Kya yeh Sikandar ke baare mein baat karna chahti hai? Itni bari baat sirf wohi ho sakti hai,’ Adhara ne socha.
Adhara se be-khabar, Hera aur zyada pareshan ho gayi jab us ne Adhara ki aag ko purple fire mein badalte dekha.
Aur jab us ne suna ke Adhara ne apna element Sikandar ki madad se evolve kiya, to woh waqai stun ho gayi.
Hera ki nazron mein, Adhara ab University ke liye ek aur qeemti asset ban chuki thi.
Aur agar woh Sikandar ko rok nahi sakti, to woh Adhara ko bhi nahi rok paaye gi.
Hera ko poora yaqeen tha ke Adhara hamesha Sikandar ke saath khari rahe gi — yeh us ka nateeja tha jab se woh dono saath reh rahe thay.
Faraday University ke daur mein, Hera ne upper management ko woh waqia bataya tha jab us ki Sikandar se mulaqat principal office ke bahar hui thi.
Us ne unhein apni fikar batayi thi ke Sikandar ko scout kiya ja sakta hai.
Agar Sikandar Faraday University chala gaya, to Ochyra University pehle saal ki doosri sab se taqatwar student — Adhara — ko bhi kho de gi, kyun ke Adhara hamesha Sikandar ka saath degi.
“Theek hai… lekin zyada dair nahi,” Adhara ne aakhirkaar kaha.
Is tarah dono Training Hall se nikal kar paas hi maujood park ki taraf chal di.
Park ke beech ek khoobsurat water fountain tha, charon taraf hara bhara manzar — jagah waqai sukoon bakhsh thi.
Yeh couples ke liye mashhoor jagah thi, jahan students hans hans kar baatein aur flirt kar rahe thay.
Hera ne bench par baith kar seedha sawal kiya,
“Tumhein pata hai Sikandar ne Faraday University ke principal office mein kya baat ki thi?”
Adhara ne bhonwen sikor li, yaad karne ki koshish ki…
phir sar hila diya.
“Nahi… mujhe to yeh bhi nahi pata tha ke woh principal ke paas gaya tha.”
Hera ne andaza laga liya tha ke Adhara ko nahi pata hoga.
Us ne hont kaat kar kaha,
“Tournament ke baad, Sikandar achanak principal office chala gaya tha.”
“Tum samajhti ho na iska kya matlab hai?” Hera ne Adhara ko dekhte hue poocha.
Adhara ne gehri soch mein Hera ko dekha.
‘Is liye dono ke darmiyan ajeeb si vibe thi…’
Phir us ne seedha jawab diya,
“Agar tum mujh se keh rahi ho ke main Sikandar se rehne ki bheek maangun — to yeh mumkin nahi.”
Dil mein us ne khud ko correct kiya,
‘Waise… bilkul namumkin bhi nahi.’
Aaj kal Sikandar ka rawaiya ajeeb tha…
aur Adhara khud bhi wahi ajeeb ehsaas mehsoos karti thi.
Jaise dil mein titliyan ur rahi hon, jo use Sikandar ke samne kamzor bana deti thi.
“Sikandar ko rokne ka sirf ek tareeqa hai — faida.”
“Main jaanti hoon woh kya chahta hai, aur us ke goals faiday ke baghair poore nahi ho sakte.”
Yeh suntay hi Hera ne Adhara ka haath pakar liya,
“Hamari resources Faraday University jaisi nahi hain… humare students bhi bohot zyada hain. Hum un jaise faiday nahi de sakte.”
Adhara ne bilkul thanday lehje mein kaha,
“Phir main madad nahi kar sakti.”
Yeh keh kar woh khari hui aur bina peeche dekhe chal di.
Adhara sab samajh chuki thi —
Hera jhoot bol rahi thi.
Emotion aura se use saaf pata tha ke University faiday de sakti hai, bas dena nahi chahti.
‘Yeh log Sikandar ki qeemat nahi samajhte… jab ke Faraday University use pehchan chuki hai,’
Adhara ne socha.
---
Adhara ke jaate hi ek aadmi Hera ke paas aa kar baith gaya.
“Kaisa raha?” us ne poocha.
Hera ne pareshaani mein baal bandhte hue kaha,
“Bura… us ne saaf keh diya ke Sikandar ko rokna hai to faiday do.”
“To phir use dhamka dete hain?”
“Us ka irada todna mere liye asaan hoga.”
Hera ne thandi si hanssi hans di.
“Tum? Early Rank Five?”
“Tum akelay kya, tum jaison ke saath bhi us ka kuch nahi bigaad sakte.”
“Main experience se keh rahi hoon… agar tum ne kuch ghalat kiya, to shayad zinda bhi na bach sako.”
Hera ko yaad aaya ke kaise Sikandar ne white assassins ko bina reham ke maar diya tha…
jaise woh insaan hi na hon.
Kevin ke khilaaf bhi woh poori taqat use nahi kar raha tha.
“Yeh mumkin nahi… main apni skills par bharosa karta hoon.” aadmi ne kaha.
Hera uth khari hui,
“Jab us se milo ge, tab yaad rakhna ke maine pehle hi warn kiya tha.”
Mur kar jaate hue us ne kaha,
“Mujhe do din do… shayad koi tareeqa nikal aaye.”
---
Meanwhile…
Sikandar shehar ke bahar ek darakht ke neeche baitha tha.
Us ke haath mein ek kali kitab thi jiske cover par likha tha:
“Black Field Orko”
Yeh ek aisi spellbook thi jo Black Lightning ko directly use karti thi —
sirf Black Lightning Elementalist hi isay chala sakta tha.
Sikandar is spell ko seekh raha tha taake gold bachaya ja sake.
Achaanak…
“Haachoo!”
‘Kya koi meri burai kar raha hai?’ us ne socha.
Isi waqt zameen kaanp uthi.
Shehar ke guards ne siren baja di.
Sikandar ne kitab inventory mein daali, body stretch ki,
aur seedha city wall par jump laga di.
Samne hundreds of creatures dhool udataay hue shehar ki taraf aa rahe thay.
Sikandar ne apne stats check kiye aur muskuraya,
“Chalo… Exp farming shuru karte hain.”
---
Chaar din guzar chuke thay.
Karan aur Ryze, Suraj ke sath training kar rahe thay. Is waqt woh ek obstacle course par thay jo Suraj ne khud banaya tha—bilkul us training jaisa jo usay USR mein mili thi.
Yeh obstacle course jaan-levā nahi tha, lekin stealth ka sakht imtehaan zaroor tha.
Is mein rassi se bandhi hui sheeshe aur bottles thi jo daayein-baayein jhool rahi theen, lakri ke patray thay jin par se baghair awaaz ke guzarna tha, aur ek dummy tha jisse bach kar nikalna zaroori tha.
Suraj side par khara dono ko dekh raha tha. Uski aankhein unki har chhoti se chhoti harkat ko scan kar rahi theen.
Achanak usne apni taraf se ek rassi kaat di.
Dummy foran Karan aur Ryze ke samne aa gaya.
Dono ne bina aik bhi awaaz kiye foran side-step kiya.
Woh is course ke aadat mein aa chuke thay—lekin training abhi khatam nahi hui thi.
Clang!
Achanak Ryze ka paon ek bottle se takra gaya.
Bottle pehle awaaz karti hai aur phir zameen par gir jaati hai.
Thud!
Ryze ghabra kar Suraj ki taraf dekhta hai. Uska focus toot chuka tha—sirf aik lamha ki ghaflat, aur ghalti ho gayi.
Suraj ki nazar foran sakht ho jaati hai.
Woh ishara karta hai ke Ryze uske paas aaye.
Agla hi pal, Suraj apni chhuri se Ryze ki peeth par aik tez cut lagata hai—yeh dono ko yaad dilanay ke liye ke unki tawajjoh abhi kamzor hai.
Yeh USR ke muqable mein sirf aik halki saza thi.
Jab Suraj khud USR mein training karta tha, wahan har ghalti par insaan ko whip kiya jata, kaata jata, aur Red Box mein band kar diya jata tha—jahan asal azaab shuru hota tha.
Wahan training itni be-reham thi ke aik chhoti si ghalti bhi bardasht nahi hoti thi.
Sirf Red Box ka khayal hi Suraj ki rooh tak ko jhunjhor deta tha.
Training course mukammal hotay hi Karen aur Ryze zameen par gir paray.
Dono intehai thakay huay thay. Apna jism bilkul sakht rakhna—har lamha control mein rehna—unhein andar tak thaka chuka tha. Jism dard se bhara hua tha.
Suraj ne unhein dekha aur kaha,
“Tum dono yahin raho, main aa kar training dobara shuru karunga.”
Na Karan ne jawab diya, na Ryze ne—sirf halki si gardan hila kar dono thakan se zameen par let gaye.
Din abhi roshan tha.
Suraj ne aik cigarette nikali aur Ochyra University ki taraf chal diya. Usey kuch check karna tha, phir woh training resume karta.
Sikandar abhi tak mission se wapas nahi aaya tha—lagta tha woh kaafi zyada masroof hai.
---
Isi dauran, Adhara Training Hall mein thi.
Dagger training aur purple fire practice ke sath sath, woh meditation ke liye bhi waqt nikaal rahi thi—taake jo rune woh bana rahi thi, usay dobara stable kar sake.
Chahe kitni bhi training ho, meditation uske liye laazmi thi.
Woh nahi chahti thi ke phir se Sikandar usse aage nikal jaye—isi liye woh bina rukay, kam se kam araam ke sath training kar rahi thi.
Yeh sab sirf is liye mumkin tha kyun ke woh ab mukammal taur par Werewolf ban chuki thi.
Uski gardan par Silverstar Mark ab poori tarah grey ho chuka tha.
Uski evolution complete ho chuki thi, aur woh apne jism mein aanay wali tabdeeliyan mehsoos kar rahi thi.
Uske senses aur tez ho gaye thay.
Uski haddiyan aur zyada mazboot ho chuki theen—yeh kehna ghalat nahi hoga ke uski bones ab steel se bhi zyada sakht theen.
Pichlay kuch dino mein Adhara do martaba Karan ko dekhne gayi thi.
Usne dekha ke Suraj kitni be-rehmi se unhein train karta hai.
Dusri dafa jab woh wahan gayi, toh usne Suraj ko balcony mein akela cigarette peetay dekha.
Suraj ne abhi cigarette jalai hi thi ke aik aadmi ghar ke samne phisal kar zor se gir gaya.
Girna kaafi khatarnaak tha.
Adhara madad ke liye aage barhna chahti thi, lekin ruk gayi.
Usne dekha ke Suraj ne sir ghooma kar us manzar se muh pher liya—jaise woh darr gaya ho.
Uske chehray par khauf saaf nazar aa raha tha.
Agla hi pal, usne jalti hui cigarette apni hi haath ki jild par daba di.
Uski harkat itni smooth thi jaise reflex ho.
Dard ke bawajood, uska chehra foran phir se bilkul be-hiss aur sakht ho gaya.
Woh dobara cigarette peenay laga.
Aadmi uske samne pada madad ke liye cheekh raha tha—uska ankle toot chuka tha.
Phir bhi Suraj ne koi madad nahi ki.
Woh chupchaap ghar ke andar chala gaya.
Jaise hi Suraj andar gaya, Adhara foran bhaag kar us aadmi ke paas pohanchi aur madad ki.
Ankle waqai buri tarah toota hua tha.
Adhara ne ghar ke darwazay ki taraf ghoor kar dekha aur bhari awaaz mein socha:
“Yeh aadmi madad kyun nahi karta? Kya is mein bilkul reham nahi?”
Woh us aadmi ko qareebi hospital le gayi.
---
Wapas haal mein…
Adhara phir se Training Hall mein thi.
Suraj ka woh rawaiya abhi tak uske zehan se nahi nikal raha tha—yeh baat usse bilkul samajh nahi aa rahi thi.
Is waqt Adhara purple fire par poora control hasil kar chuki thi.
Ab woh aag ko bilkul azadana taur par control kar sakti thi.
Suraj ka diya hua routine ab uske liye asaan ho chuka tha—yeh saabit karta tha ke woh waqai dagger ke liye bani hai.
Uski dagger par lapti hui Purple Fire ab khoobsurat lag rahi thi—pehle ki tarah be-qabu nahi thi.
Jab woh dagger ke sath integrate hoti, toh aag aik crescent shape bana leti—jis se dagger ki reach aur bhi zyada barh jaati.
Adhara muskurayi.
Adhara ko ehsaas hua ke dagger wielder ki sab se bari kami uska attack range hota hai, isi liye us ne apni purple fire ko usi kami ko poora karne ke liye shape diya.
Adhara ne seedha apne saamne slash kiya, phir pal bhar mein apna jism ghumaya aur peechay ki taraf ek aur waar kiya.
SLASH!
Uski movement pani ki tarah smooth thi—na koi extra harkat, na koi kamzori.
Uska form tight aur mazboot tha.
Adhara ka jism ab is move ko aise yaad kar chuka tha jaise wo saalon se dagger training kar rahi ho. Ab uski harkat pehli baar ki tarah stiff nahi rahi thi.
Training ke darmiyan achanak us ne mehsoos kiya ke koi uski taraf aa raha hai.
Us ne baen taraf nazar daali aur dekha ke Suraj use hairani bhari nazron se dekh raha hai.
“Mujhe hairat hai tum ne itni jaldi isay master kar liya,”
Suraj ne kaha.
“Tum waqai dagger ke liye blessed ho.”
Adhara ne seedha kharay ho kar jawab diya,
“Thanks , lagta hai ab mujhe is ka andaaza hone laga hai.”
Suraj ne apne haath mein pakri safed plastic bag uthai,
“Khane chalogi? Maine bahar se liya hai.”
Bag ki taraf dekh kar Adhara ne halka sa sar hila diya.
Dono qareeb hi ek jagah ja kar baith gaye aur satay khana shuru kiya jo Suraj ne Ochyra University ke bahar ek stall se liya tha.
Dono khamoshi ke saath khana kha rahe thay.
Unke darmiyan ek awkward si fiza thi.
Wo dono zyada qareebi nahi thay—aur Adhara ko Suraj ke saath rehna is liye bhi ajeeb lag raha tha kyun ke Faraday University ke tournament ka waqia abhi tak uske zehan mein taaza tha.
Adhara chhotay chhotay niwalay le rahi thi jab ke Suraj beech beech mein use dekh raha tha.
Aakhir Suraj ne baat shuru ki,
“Tume jo move diya tha wo tum ne bohat tez seekh liya.
Ek aisi ladki ke liye jo zindagi mein kabhi dagger nahi pakri—yeh kaafi impressive hai.”
Adhara ne jawab diya,
“Pata nahi… dagger bas mere haath mein sahi lagta hai.”
Suraj ne sar hila diya.
Khamoshi phir wapas aa gayi, aur Adhara ko phir se ghutan mehsoos hone lagi.
Jab Adhara ne khana khatam kiya, Suraj ne poocha,
“Sikandar kaisa hai?”
Yeh sun kar Adhara ne bhonay sikor liye,
“Kya matlab?”
“Mera matlab… wo theek hai?
Kabhi ajeeb tareeqay se behave karta hai?”
Suraj ne wazahat ki.
Suraj military ke baad Sikandar ki zindagi ke baare mein curious tha.
Use yeh jaan kar sukoon mila tha ke Sikandar zinda bach gaya, lekin military ke baad unki mulaqaat sirf kuch hi baar hui thi.
Usay laga ke Adhara zyada jaanti hogi, kyun ke wo aksar Sikandar ke saath rehti hai.
Adhara ne kuch dair socha, phir boli,
“Nahi…
bas uska ruthless behavior hota hai jo har dafa mujhe shock kar deta hai jab wo us mode mein chala jata hai.”
Suraj ne gehri saans li.
Yeh jawab wo pehle hi expect kar raha tha.
Suraj ke chehray ka haal dekh kar Adhara ne poocha,
“Agar bura na mano…
kya tum ne military se dismiss hone ke baad kabhi doctor ko dikhaya?”
Suraj hairani se Adhara ki taraf dekhnay laga.
“Yeh sawaal kyun?”
Adhara ne kaha,
“Kal main ne tumhein dekha tha jab ek aadmi tumhari aankhon ke saamne apna ankle tor betha.”
Suraj ne apna chehra ghuma liya.
Kuch lamhay khamoshi rahi, phir wo dheemi awaaz mein bola,
“Tum ne sab kuch dekha tha?”
“Haan,”
Adhara ne seedha jawab diya.
Adhara ko laga ke shayad ab Suraj kuch bataye ga, lekin achanak wo khara ho gaya.
“Tumhein sirf itna pata hona chahiye,”
Suraj ne kaha,
“ke har koi is sab ko Sikandar ki tarah handle nahi kar sakta.
Har koi wapas aa kar pehle jaisa nahi rehta.”
Yeh keh kar Suraj wahan se chal diya.
Jaate jaate us ne kaha,
“Agla move baad mein dunga.
Bas ghar aa jana.”
---
Isi waqt, jab Adhara aur Suraj baat kar rahe thay…
Sikandar ek bohat bari hall ke andar tha,
jahaan log naach gaana aur jashn mana rahe thay.
Yeh jashn is liye tha kyun ke jo Supernatural pehle shehar par hamla awar hua tha, usay shikast di ja chuki thi.
Yeh Sikandar ki Ochyra University chhorne ke baad teesri mission thi.
Wo is waqt Level Three City mein tha.
Yeh shehar pehle walay shehar se zyada developed tha—
buland skyscrapers aur kaafi Awakened yahan rehte thay.
Yahan ke bohat se Awakened ne shehar chhorna nahi chaha,
kyun ke yahi unka ghar tha.
Insano ne border par Supernatural ke khilaf jang haari thi.
Us ke baad bohat bari tadaad mein Supernatural insani ilaqon mein ghus aaye, aur aakhir kar yahan tak pohanch gaye.
Undead ki ek poori horde,
early rank three se le kar early rank four tak,
shehar ke andar qiyamat macha rahi thi.
Mazboot deewar bhi unhein rok na saki.
Yeh kisi mojzay se kam nahi tha ke Sikandar waqt par pohanch gaya.
Shehar ke guards sirf rank three Awakened thay—
wo is horde ka muqabla nahi kar sakte thay.
‘Pichlay kuch dinon mein main do level upar chala gaya,’
Sikandar ne socha.
‘Yeh meri umeed se bhi tez hai.’
Task Hall se lagataar missions lene ki wajah se Sikandar ne bina apni jaan ko zyada khatray mein daalay do level hasil kar liye thay.
Wo zyada tar sirf rank three aur early rank four dushmano se larta raha.
Sikandar ne phone nikaal kar naya mission lene ka socha hi tha ke System notification aa gayi.
<Carabidis Temple qareeb hai>
Yeh parh kar Sikandar ne foran Pack Quest khol li.
Map dekh kar use pata chala ke Carabidis Temple sirf 6 kilometer door hai.
‘Kya mujhe wahan jaana chahiye?’
Sikandar ne socha.
Use pata tha ke Pack Quest uski zindagi ka sab se mushkil quest hoga,
lekin us ke rewards bhi utne hi lajawab thay.
Kuch dair sochne ke baad,
Sikandar ne faisla kar liya.
Shehar ke log us ka shukriya ada kar rahe thay.
Awakened bhi us ke ehsaan mand thay.
Uski wajah se shehar ki casualties bohat kam ho gayi thi.
Undead horde lagbhag us warehouse tak pohanch chuki thi jahan shehar ke log panah liye hue thay—
lekin Sikandar ne bilkul aakhri lamhay par unhein rok liya.
‘Agar main dair se pohanchta…’
Sikandar ne khud ka shukar ada kiya.
Shehar se nikal kar Sikandar West ki taraf Carabidis Temple ki janib daur pada.
Das minute baad…
Wo us jagah pohanch gaya jo system ke mutabiq Carabidis Temple thi.
Lekin us ke saamne sirf
ek bohat gehri chattan thi.
Sikandar ne neeche jhaank kar dekha—
gehri siyah badliyan neeche ki sab cheez chhupa rahi thi.
Achaanak aasman andhera ho gaya.
Pitter… Patter…
Barish achanak tez ho gayi,
aur Sikandar ke kapray chand lamhon mein bheeg gaye.
CRACK!
BOOM!
Bijli chamki, aur zor daar garaj ne fiza hila di.
Sikandar ne bhonay sikor liye.
‘Yeh bilkul acha sign nahi lag raha…’
Us ne dil hi dil mein kaha.
---
Aaj ke liye itnah hi. I hope ye episode be aap ko pasind ahye gah.
Is episode mai Sikandar ki jo fight thi wo nahi dikhai gai kyo ke wo sub supernaturals Sikandar se kafi low level ke the. Aur zahir hai Sikandar ke samne kuch be nahi the.
Aur ye missions bs Sikandar ke leve up karne ke liye the. Aur agir mai fight dikhata to awi fazool mai 1 2 episodes nikal jate.
Lekan pir be aap sub ko fight chahye to is liye is bar koi target nahi 2 din ke bad update ah jaye gah. Jo kafi acha hone wala hai.
Kyo ke ye pack mission Sikandar ka sub khatenak mission hone wala hai.
Pir be likes aur review zaror dena.
Aur koi suggestion hun to wo be.
Bane rahiye sath.
Milte hai nex episode mai. Tab tak ke liye.
Thanks, Good night and Bye.
