Episode 59
Fight
Suraj ne Ms. Greene aur Robert ka haath zor se pakra, jabke Adhara aur uska father bhi unke peeche bhaagte hue Emham Forest ki taraf daud pade. Kisi ne bhi peeche mur kar dekhna zaroori nahi samjha.
Sab kuch itni tezi se hua ke sochne ka mauqa hi nahi mila.
Suraj ne chand lamhe pehle hi ek mashkook shaks ko unhein ghoorte hue dekh liya tha—aur us nazar mein sirf tajassus nahi balkay shikari wali darindagi thi.
Adhara Suraj ke is achanak reaction par hairaan thi, lekin kuch hi pal baad uske senses ne usay hoshyaar kar diya.
Woh akelay nahi thay.
Unke peeche log thay…
aur unki aura se saaf pata chal raha tha ke woh Awakened hain.
“Suraj! Hum bhaag kyun rahe hain?!”
Mrs. Greene ne ghabrahat ke sath poocha.
High heels mein bhaagna unke liye mushkil hota ja raha tha. Woh Suraj aur baqi logon ki raftaar ka saath nahi de paa rahi thin.
Suraj ne aik pal bhi zaya nahi kiya.
Usne Mrs. Greene ko seedha apni baahon mein utha liya.
“Maaf kijiye Mrs. Greene,”
Suraj ne gehri saans ke sath kaha,
“magar is waqt samjhane ka waqt nahi.”
Aur phir woh dobara poori taqat se daud pada.
Magar group mein teen aam log hone ki wajah se, peechay aane walay bohat jaldi unke qareeb aa gaye.
Adhara ne peeche mur kar dekha—
Teen shaks… bilkul qareeb.
Usne zameen par zor se qadam maara.
Uska jism purple aag se bharrak utha.
Zameen par purple sholon ka aik daaira ban gaya.
Un mein se aik chaser ne ghaflat mein us daire par qadam rakh diya.
“Huh…?”
Usne neeche dekha—
Daaira chamak utha.
BOOOOM!!
Zameen phatt gayi.
Jamni aag ka zabardast dhamaka hua jis ne aas paas ke darakhton ko jala diya. Zameen tez jhatkay se kaanp uthi.
“Aaaahh!!”
Mrs. Greene cheekh uthi.
Robert ne kaan dhak liye aur Suraj ke qareeb aa gaya jab dhamakay ki lehr aur malba unki taraf aaya.
Suraj ne peeche dekha—
Adhara poori tarah jamni aag mein lapti hui thi.
Usne halka sa sar hila kar isharah kiya—
aur bhaagna jaari rakha.
Adhara ke father ne yeh manzar dekha to saans ruk si gayi.
“Tum… itni taqatwar kab ban gayi?”
Uski awaaz yaqeen aur hairani ke darmiyan kaanp rahi thi.
Adhara ne koi jawab nahi diya.
Bas apne father ka haath pakra aur aage kheench liya.
Teen chasers mein se aik Adhara ke jaal mein phans chuka tha. Uski taange buri tarah jali hui theen aur chehra dard se bigar gaya tha.
Magar baqi do ab bhi peecha kar rahe thay.
Yeh kaun hain?
Suraj ne dil mein socha.
Na Atkins… na Reed.
Unki taqat rank four ya five ke qareeb thi—
isi liye un se bachna mumkin tha.
Agar yeh Atkins ya Reed Family hoti…
toh 100 meter bhi bhaagna namumkin hota.
“Jaldi karo! Agar woh wahan pohanch gaye toh sab khatam ho jaayega!”
Aik chaser cheekha.
Woh jaanta tha ke Suraj ka rukh Cluster Domain ki taraf hai.
Dono ne apni raftaar aur tez kar di.
Kuch hi lamhon mein woh bilkul peechay aa gaye.
Haath aage barhne lage—
bas aik shaks pakarna kaafi hota.
Suraj ne foran Mrs. Greene ko Robert ke hawalay kar diya.
Phir usne Adhara ko aik gehri, pur-maaney nazar se dekha.
“Unhein le jao,”
Suraj ne kaha,
“Yahan main aur Adhara sambhaal lenge!”
Robert ne aik pal ki dair kiye baghair apni biwi ko sambhala aur aage bhaag gaya.
Adhara ke father ruk gaye.
Unka jism jaise zameen se chipak gaya ho.
“Adhara—”
Uski awaaz dar se bhar gayi.
Magar dair ho chuki thi.
Suraj aur Adhara ne chasers ka saamna kar liya.
Suraj ka jism surkh roshni se chamak raha tha,
jabke Adhara purple aag mein doobi hui thi.
Har aik ne aik aik dushman ka muqaabla shuru kar diya.
Adhara ne apna dagger nikaala.
Aag aur steel ki takraar se jungle jalta hua maidan ban gaya.
Usne Suraj se seekhi hui dagger technique istemal ki—
magar foran mehsoos kiya ke uska muqaabil koi aam Awakened nahi.
Woh har hamlay ko pehle hi parh leta tha.
Daayein… baayein…
aasani se dodge.
Sab Fire Elementalist thay.
Unki takraar se darakht jalne lage.
“Fire Spell—
Fireball!”
SWOOSH!
Aag ka aik gola Adhara ki taraf lapka.
Itni shiddat ki garmi ke Adhara ke father ki jild bhi jal uthi.
Usne khauf se Adhara ki taraf dekha—
Aur phir sakht hairan reh gaya.
Adhara ne apna element activate kar diya.
Jamni aag aur zyada bharrak uthi.
Uske haathon se jamni sholay phootne lage.
Rank mein buland hone ki wajah se, uski aag ne dushman ke fire element ko dabaa diya.
Fireball laraz gaya…
kamzor par gaya.
Adhara ne jamni aag se dhaki hui ungliyon se fireball ko pakra—
Aur zor se ghooma diya.
BOOM!!
Dhamakay se Adhara ka father peechay gir pada.
Uski aankhon ke saamne uski chhoti si beti aik be-rahm jangju ban chuki thi.
Aur Adhara ka chehra—
Bilkul pursukoon.
Jaise yeh sab roz ka mamool ho.
Doosri taraf, Suraj peeche dhakela ja raha tha.
Uska muqaabil rank five Awakened tha.
Sirf skills ke dum par woh elemental faida poora nahi kar sakta tha.
Dushman us se kaafi zyada taqatwar tha.
Magar phir bhi—
Suraj seedha saamna nahi kar raha tha.
Woh lagataar daayein aur baayein dodge karta raha—
bas waqt khareed raha tha.
Aur phir achanak—
Aik bhaari, qatilana awaaz goonji:
“Colossal Punch!”
BAM!!!
Suraj daayein taraf uchhal kar bacha, aur bilkul usi lamhay apna punch us fireball par maar diya jo uske bilkul paas tha. Uske reflexes intehaai tez thay—fireball hawa mein hi bikhar gaya, is se pehle ke woh Suraj ko lagta.
Lekin jaise hi woh zameen par land hua, chaser seedha uske saamne aa chuka tha.
Suraj ki aankhon ke bilkul saamne aata hua ghoonsa dekh kar, uske paas bachne ka koi rasta nahi tha. Itni qareeb se dodge karna namumkin tha.
BAM!
Ghoonsa seedha uske chehre par laga. Suraj hawa mein uchhalta hua peeche ja gira, aur uske munh se khoon behne laga.
Chaser ki taqat ko kam samajhna ghalti thi.
“Is aadmi ke teen punches se zyada main bardasht nahi kar sakta,” Suraj ne dil hi dil mein socha.
Usne mauqa dekhte hi khud ko peeche ki taraf slip karwaya, jab usne dekha ke Adhara ne kuch dair ke liye upper hand hasil kar li hai.
Adhara bhi foran dash karti hui peeche hati aur apne father ko pakar kar le gayi. Uske chehre par ghussa saaf nazar aa raha tha—kyun ke uske father ab tak sirf kharay ho kar sab kuch dekh rahe thay.
Zyada dair nahi guzri ke Adhara aur Suraj ne dekha ke Robert aur Mrs. Greene unke bilkul aagay kharay hain.
Lekin woh ghir chukay thay.
Unke ird gird mutated jangli suar thay—un ki jild itni siyah thi ke raat se bhi zyada andheri lag rahi thi. Unki aankhon mein darindagi chamak rahi thi, jise dekh kar haath kaanp uthtay.
Suraj ne aik pal bhi zaya nahi kiya.
Usne apni dagger nikaali aur aik hi lamhay mein sab suaron ko kaat diya.
Unhein jawab dene ka bhi mauqa nahi mila—Suraj ki dagger ne unke sar bilkul saaf taur par alag kar diye.
“Chalo, move karo!” Suraj ne kaha aur dobara bhaagna shuru kar diya.
Suraj ki side nazar se usay Cluster Domain ka entrance dikh chuka tha—aur woh zyada door nahi tha.
“Bas wahan tak pohanch jaoon… Ugrok meri madad kar sakta hai,” Suraj ne socha.
Lekin achanak—
Uske kandhay ko kisi ne zor se pakar liya.
Suraj ruk gaya aur peeche dekha.
Rank Five Chaser bilkul uske upar tha.
Usne Suraj ko peeth se pakra aur seedha qareebi darakht par ja patka.
BRAK!
“Argh!” Suraj dard se karaah utha.
Adhara ne yeh dekha aur foran cheekhi,
“Dad! Aap unke saath chale jao! Agar yahan rukay toh sirf bojh ban jaoge!”
Yeh suntay hi Adhara ke father ne sir hilaaya aur bina waqt zaya kiye wahan se nikal gaye.
Unhon ne pehli dafa Adhara ko itna serious dekha tha—aur pehli baar usne bina ijazat ke hukam diya tha.
“Woh badal gayi hai… aur yeh acha hai,” uske father ne socha.
Adhara ne chaser ka saamna kiya.
Uski instincts cheekh rahi thi—yeh dushman bohat zyada taqatwar hai.
Usne apni poori taqat istemal karne ka faisla kiya.
Uske sar ke upar 22 purple aag se bani scimitars zahir hui, aur chaser ke paon ke neeche purple aag ka aik daira ban gaya.
Chaser ne yeh dekh kar apna jism aag mein lapet liya.
Adhara ne haath ghumaya.
Scimitars bijli ki tarah jhatki aur phir—
BOOM!
BOOM!
BOOM!
Lagataar dhamakay hue. Zameen phat gayi, hawa dhuaan aur jali hui boo se bhar gayi.
Suraj bhi sambhal chuka tha, lekin uski peeth abhi bhi shadeed dard kar rahi thi.
Usne aagay dekha.
Chaser zinda tha—Adhara ke poore barrage ke bawajood.
Suraj ne apni daggers tight pakri—un par surkh roshni chamakne lagi.
Suraj ne Adhara ki taraf sir hilaaya.
Dono aik saath dash hue.
“Yeh bekaar ki koshish chhor do,” chaser muskurate hue bola.
“Agar tum Sikandar ko yahan le aao, toh main tumhein bohat bara inaam doon ga.”
Yeh awaaz suntay hi Suraj ka khoon thanda ho gaya.
Usay yaad aa gaya—
Yahi aadmi tha jo pehle bhi us par hamla kar chuka tha, jab Sikandar ne usay spellbook chhupane ka kaam diya tha. Tab Ugrok ki wajah se hi woh bach paaya tha.
Suraj aur Adhara ne aik ke baad aik vaar kiye.
Left, right—perfect coordination.
Lekin chaser ne unki har combined attack ko asaani se dodge kar liya.
Peechay Mrs. Greene, Robert aur Adhara ke father phans chukay thay.
Ab bhaagne ka koi rasta nahi tha.
Explosion har taraf ho rahe thay.
Robert apni biwi ko galay lagaye hue tha, jab ke Adhara ka father situation ko ghor se dekh raha tha—agar kuch ghalat hota, toh woh sirf Adhara ko bachanay ka plan bana chuka tha.
“Akkhh!!”
Suraj aur Adhara dono hawa mein uchhal kar door ja giray.
BAM!
Darakhton se takra kar unke jism zameen par phislay.
Chaser bohat zyada taqatwar tha—yeh ladai unke bas ki nahi thi.
Lekin qismat se—
Woh dono Cluster Domain ke bilkul saamne aa giray.
Suraj ke chehre par halka sa sukoon aa gaya.
Usne poori taqat se cheekha,
“UGROK! MERI MADAD KAR!”
ROARRR!!
Cluster Domain ka darwaza phat gaya.
Ugrok bahar nikla—apni poori haybat ke saath. Uske paas aik chhota sa bijli ki raftaar wala Cyclops bhi tha.
Ugrok ko dekhte hi chaser ke qadam peeche hat gaye.
Usay apni pehli mulaqat yaad aa gayi—
Us din woh marte marte bacha tha.
Chaser ne bhaagne ki koshish ki—
Lekin—
Ugrok ne uski taang pakar li.
“Eh?”
BAM!
Usay zameen par patak diya gaya. Zameen makri jaalay jaisi phat gayi.
“HUAKH!”
Khoon uske munh se phoot nikla.
Robert, Mrs. Greene aur Adhara ke father ki aankhein phat gayi.
Shehar ke beech aisi khaufnaak supernatural makhlooq dekhna unke liye soch se bahar tha.
Khaaskar Adhara ke father —
Ugrok ko dekh kar uski aankhein laal ho gayin,
jaise usne apna purana dushman dekh liya ho.
Ugrok ne dobara chaser ko zameen par maara—
haddiyan tootne ki awaaz saaf sunai di.
Phir Ugrok ne apna bada sa club uthaaya—
BOOOOM!
Zameen aur zyada tabah ho gayi. Shockwaves se qareebi darakht gir gaye.
Chaser ab bilkul be-bas tha.
Ugrok ne uska sar apne haath mein pakra aur gurraya—
woh uska sar kuchalna chahta tha ke achanak—
Tap.
Kisi ne uske kandhay par haath rakha.
Ugrok ruk gaya.
Uske naak mein aane wali khushboo se usay foran pata chal gaya ke peeche kaun hai.
Ugrok ne chaser ko chhor diya.
Jab sab ne us shakhs ko dekha—
Unki aankhein chamak uthein.
“SIKANDAR!”
Sikandar araam se aage barha, haath jaibon mein daalay hue. Usne Ugrok ko ishara kiya ke side par ho jao.
Phir uski nazar chaser par pari.
Chaser haanf raha tha—
aur jab usne Sikandar ke chehre par woh be-reham expression dekha—
Uske zehan mein sirf aik khayal aaya:
“Main mar gaya…”
---
Chaser ki aankhen phail gayin jab usne Sikandar ko scene par aate dekha.
Uska irada tha ke Sikandar ko yahin khatam kar de, kyun ke pehle woh pur-umeed tha ke woh use overpower kar lega.
Lekin ab…
Uski apni halat khud batane ke liye kaafi thi—zakhmon se choor, saans be-tarteeb, aur himmat toot chuki thi.
Jis lamhe chaser ne Sikandar ko dekha, usi lamhe usey samajh aa gaya ke ab koi raasta nahi bacha.
Sikandar ne apni thodi si gardan utha kar Cluster Domain ki taraf ishara kiya, Ugrok ko wapas andar jaane ka signal dete hue.
Sirf Sikandar ki maujoodgi hi baaqiyon ke dilon mein khauf bhar rahi thi.
Woh yeh baat saaf mehsoos kar sakta tha—
Apne parents ke chehron se, aur khaas tor par Adhara ke father ke chehre se.
Adhara ke father ka chehra aisa tha jaise woh Ugrok ko zinda nigal jana chahte hon.
Sikandar uski aankhon mein wahi nafrat dekh sakta tha jo kabhi khud uske dil mein bhi thi.
Yeh dekh kar Ugrok ne halka sa sar hilaaya aur bina kuch kahe Cluster Domain ke andar wapas chala gaya.
Lekin Dyrmir, uska beta, Ugrok jitna samjdar nahi tha.
FLASH!
Dyrmir aik jhatke mein idhar-udhar flash hua aur seedha ja kar Robert ke samne ruk gaya.
Uski badi badi aankhon mein tajassus tha—jaise koi naya khilona dekh liya ho.
Robert ghabra kar aik qadam peeche hat gaya.
Usey bilkul samajh nahi aa raha tha ke Dyrmir uske samne kyun khara hai.
“Tum kya ho?”
Dyrmir ne pur-josh lehje mein kaha, Robert ko upar se neeche tak ghoorte hue.
Robert ne jhat se jawab diya,
“Yeh sawal toh mujhe tum se poochna chahiye!”
Dyrmir abhi kuch aur kehne hi wala tha ke Ugrok ne aik pal mein usey pakar liya aur zabardasti Cluster Domain ke andar le gaya.
ZONG!
Jab Ugrok aur Dyrmir dono chalay gaye, Sikandar ki nazar apni maa par ja kar ruk gayi.
Itne arsey baad unhein dekh kar uska dil chaha ke woh daur kar unhein gale laga le…
Lekin woh ruk gaya.
Pehle usey chaser ka hisaab barabar karna tha.
Sikandar ne apni maa ki taraf halki si muskurahat bheji, phir chaser ko pakra aur usey apne saath le gaya.
Jaate hue usne Suraj aur Adhara ko ishara kiya ke wahin rukein—
“Zyada dair nahi lagegi.”
BAM!
Sikandar ne chaser ko zor se uchal kar aik darakht ke samne phenk diya.
Yeh aik bay-reham throw thi—Sikandar ko uski choton se koi farq nahi parta tha.
Woh chaser ke samne jhuk kar baith gaya aur pur-sukoon awaaz mein bola,
“Tum mujhe dhoond rahe thay?”
Chaser ne ghabrahat mein baar baar sar hilaaya.
Pehle usey yaqeen tha ke woh Sikandar ko hara dega,
lekin ab—
Sikandar aur uske gird ke mahaul ko dekh kar uska apni quwwat par bhi bharosa uth chuka tha.
“Lo, main yahin hoon,”
Sikandar ne halki si muskurahat ke sath kaha.
Chaser ki awaaz kaanp gayi,
“Main majboor tha… please mujhe bakhsh do, meri family hai!”
Yeh sun kar Sikandar ne be-zari se aankhen ghumaa dein.
Yeh alfaaz us par koi asar nahi karte thay.
Usey pata tha—
Agar halaat ulat hote, toh yeh aadmi aik pal bhi reham na karta.
“Tum Platchi se ho?”
“Tumhara naam kya hai?”
Sikandar ne dheemi lekin bhaari awaaz mein poocha.
Chaser jhoot bolna chahta tha,
lekin Sikandar ne pehle hi Alpha Intimidation chala di.
Is kamzor halat mein chaser Sikandar ki quwwat ka muqaabla nahi kar sakta tha.
Sikandar ki cheerti hui nazar ke neeche jhoot uske hont tak bhi nahi aa saka.
Aakhirkaar usne sach bol diya,
“Mera naam Leon hai… Duncan ne mujhe bheja tha.
Usne dhamki di thi ke agar main tumhein na maar saka toh meri family ko maar dega.”
Sikandar ne yeh sun kar koi hairani zahir nahi ki.
Yeh jawab woh pehle hi anticipate kar chuka tha.
Leon ne yeh baat mehsoos kar li.
Sikandar dheere dheere chalne laga, phir achanak ruk kar poocha,
“Tumhari beti ka naam kya hai, Leon?”
Leon ke chehre par gusse aur dard ka mila-jula asar tha,
lekin phir bhi usne jawab diya,
“Estella… meri beti ka naam Estella hai.”
Sikandar ne palat kar uski taraf dekha aur halki si muskurahat ke sath poocha,
“Kya tum usse pyaar karte ho?”
Leon ne foran sar hila diya.
Uske liye Estella hi uski poori duniya thi.
Tab Sikandar ki muskurahat khaufnaak ho gayi.
“Phir main usse uske bewaqoof baap ke qatl ka…
theek se muawza doonga.”
SLASH!
Leon ke gale par aik patli si lakeer ubhar aayi.
Uski aankhen hairani se idhar-udhar dekh rahi thi.
Usne dekha ke Sikandar ke haath ghair-fitri panjon mein badal chuke thay—
aur un par laga khoon… uska apna khoon tha.
Leon ne gardan pakri…
aur tab usey ehsaas hua ke uska gala kat chuka hai.
Uski nazar ghoom gayi—
aur agle hi lamhe uska sar apni jagah se phisal gaya.
Kuch hi palon mein,
Leon bina aik lafz bole…
hamesha ke liye khamosh ho gaya.
<Mid Rank Five Awakened qatal kiya gaya, 300,000 EXP hasil hui>
Sikandar baqi sab logon se alag ho gaya.
Woh Leon ko khud qatal karna chahta tha.
Sab se badi wajah yeh thi ke woh apni maa ke samne kisi ka khoon nahi karna chahta tha.
Leon ka kaam tamam karne ke baad, Sikandar ne uska kata hua sar uthaya aur poori taqat se pukara:
“SURAJ!!”
Suraj awaaz suntay hi foran uske paas aa gaya.
Usne poocha,
“Kya baat hai? Koi aur kaam?”
Adhara bhi wahan pohanch gayi.
Uski nazar Sikandar ke haath mein maujood Leon ke khooni sar par jam gayi.
Sikandar ne thandi lekin hukmana awaaz mein kaha,
“Is sar ko le jao… aur Fireband Market mein, ya kahin aisi jagah phenk do jahan Platchi ko yaqeenan khabar mil jaye.”
Reed Family ke sath jo deal Sikandar kar chuka tha,
uske baad Platchi uske liye kuch bhi nahi tha.
Ab Sikandar aur zyada be-khauf aur be-rehem ho chuka tha.
Use maloom tha ke bohot jald Reed Family poori tarah uske peeche hogi.
Ab woh Platchi Family ke khilaf seedha hamla karega.
Leon ka qatal sirf ek qatal nahi tha—
yeh warning thi.
Kaafi arsay se Sikandar aur uske qareebi log Platchi Family ke zulm ka shikar thay.
Ab shikaar banne ka daur khatam ho chuka tha.
Yeh keh kar Sikandar wahan se chala gaya
aur apni maa ke paas wapas aa gaya.
---
Sikandar ke jatay hi,
Adhara ne Suraj ko dekha jo Leon ka sar apni weapon bag mein rakh raha tha.
Khoon uske haathon par beh raha tha,
magar Suraj ke chehre par na ghin thi, na hichkichahat.
Adhara ne hairani se poocha,
“Tum aise kyun ho, Suraj?”
“Tum hamesha Sikandar ke har hukm par bina sawal ke amal karte ho.
Na kabhi mana, na kabhi shakayat.”
“Tum dono military mein aik hi team ka hissa thay,
phir bhi tumhari yeh wafadari… samajh nahi aati.”
Suraj ne bag band ki, usay kandhay par latkaya aur kaha:
“Tum se mukhtalif, Adhara…
mera Sikandar par qarz sirf dosti, paisa ya rutba nahi.”
“Mera qarz… meri zindagi hai.”
“Main shayad apni poori zindagi mein bhi yeh qarz ada na kar sakoon.”
“Bas main itna chahta hoon ke main uske liye kaam aa sakoon…
bilkul us din ki tarah jab usne kaha tha ke
meri zindagi uski zindagi se zyada qeemti hai.”
Yeh keh kar Suraj jungle ki taraf lapka
aur Adhara ko wahin hairani ke aalam mein chhor gaya.
Adhara der tak uski peeth ko dekhti rahi
jo dheere dheere jungle mein gum ho gayi.
---
Sikandar wapas baqi logon ke paas aaya
aur foran apni maa ko galay laga liya.
“Maa! Mujhe aap bohot yaad aayi,”
Sikandar ne muskuratay hue kaha.
Uski khoofnaak aur qaatil aura aik pal mein gayab ho gayi.
Mrs. Greene ro padi aur Sikandar ko zor se pakar liya,
“Mera beta… Uper wale ka shukar hai tum zinda ho.”
Usne jo ladai dekhi thi,
woh ab bhi uske zehan se nahi ja rahi thi.
Sikandar ne narmi se kaha,
“Mujhe afsos hai ke main khud aap ko lene nahi aa saka. Suraj ko bhejna para.”
Robert aagay aaya aur Sikandar ko mardana andaaz mein galay lagaya.
Uski aankhon mein fakhar saaf nazar aa raha tha.
Adhara yeh manzar door kharay dekh rahi thi.
Usay yaqeen nahi aa raha tha ke
jo shakhs kuch dair pehle qatal kar raha tha,
ab itna narm aur apna lag raha hai.
Tab achanak—
“YEH SAB KYA KAR RAHAY HO TUM LOG?!”
Adhara ke father gusse se cheekhay.
“KYA TUM LOGON NE SUPERNATURAL NAHI DEKHAY?!
YAHAN REHNA MEHFOOZ NAHI!”
Adhara ne aagay barh kar kaha,
“Dad, please—”
“MUJHE MAT CHHOO!”
woh garaj uthe.
“Adhara, mere sath chalo!
Hum ghar ja rahay hain!”
Unhon ne Adhara ka baazu pakra,
magar Adhara ne foran haath chura liya.
“Is taqat ke sath military tumhein khushi se qabool karegi,”
woh bole.
“Tum insaniyat ke liye kaam kar sakti ho!”
Adhara ne dheemi awaaz mein kaha,
“Dad… main aap ke sath nahi ja sakti.”
Tab Sikandar aagay barha aur bola,
“Sir, mujhe afsos ke sath kehna par raha hai…
magar Adhara ab meri zimmedari hai.”
“TU KAUN HAI?!”
Adhara ke father ne gusse se kaha.
Jaise hi woh Adhara ko kheenchne lage,
Sikandar ne unka baazu mazbooti se pakar liya.
“Main woh hoon jo aap ke baazu theek karega,”
Sikandar ne pur-aitmaad andaaz mein kaha.
“Aur Adhara…
apni maa ka badla meri rehnumai mein legi.”
Adhara ke father khamosh ho gaye.
Unhon ne Adhara ki taraf dekha—
Adhara ne sar hila diya.
Unka gussa dheere dheere thandaa par gaya.
---
“Filhaal sab mere peeche aayen,”
Sikandar ne kaha.
Woh apni maa ka haath pakar kar aagay barha
aur Cluster Domain ki taraf chala gaya.
Aik pal mein Sikandar hawa mein gayab ho gaya.
Sab log ghabra gaye.
Phir Cluster Domain se Sikandar ka haath bahar aaya
aur andar aane ka ishara kiya.
“Darain nahi,”
Adhara ne muskuratay hue kaha.
“Bas yahan qadam rakhein.”
Bahar jungle se mutated janwaron ki garaj aa rahi thi.
Sikandar aur Adhara ki aura gaib hotay hi
woh aur zyada wahshi ho gaye.
Dar ke maare sab log foran andar chalay gaye.
---
Andar ka mahaul khamosh aur bhaari tha.
Campfire ke paas
Ugrok khara tha—
apni poori haibat ke sath.
Sab ke chehray utar gaye.
Sikandar ne foran kaha,
“Darain nahi… yeh Ugrok hai.
Mera Supernatural pet.”
Ugrok ne adab se jhuk kar
sab ko salaam kiya.
“Main jaanta hoon ke aap sab pareshan hain,”
Sikandar ne kaha.
“Haqeeqat yeh hai ke main aik aisay maslay mein hoon
jahan aap sab ki jaan khatre mein hai.”
“Is liye main chahta hoon ke kuch din aap sab yahin rahain.
Ugrok aap ki hifazat karega.”
Yeh suntay hi Mrs. Greene ka saans tez ho gaya
aur woh behosh ho gayin.
Robert ne unhein thaam liya.
“Chand din,”
Sikandar ne yaqeen dilaya.
“Bas chand din… phir sab theek ho jaye ga.”
Robert ne poocha,
“Aakhir aisa kya masla hai, beta?”
Sikandar ne aik lamha socha, phir kaha:
“Main tafseel mein nahi ja sakta…
magar yeh sab
25 Golden Crest ki wajah se hai.”
_ _ _
“Ab hum kya karein ge?” Adhara ne poocha.
Din dhal chuka tha aur ab raat apni chaadar phaila chuki thi. Unke parents dheere dheere Cluster Domain ke mahol ke aadat mein aa chuke the aur ab Ugrok ke liye bhi unke dil mein itni ajnabiyat nahi rahi thi.
Ugrok puri koshish kar raha tha ke friendly lage.
Usne ek hiran ka bhuna hua gosht unhein offer kiya, lekin parents ne narmi se mana kar diya. Insani khanay ke baad is qisam ka gosht khana unke liye mumkin nahi tha.
Sirf Adhara ke father hi thora sa kha paaye, shayad is liye ke wo fauj mein reh chuke thay aur mushkil halaat ke aadat shuda thay.
Sikandar ne nazar ghumai aur apne parents ko dekha—
Dyrmir, Robert ke baalon ko kheench kar shararat kar raha tha.
Sikandar ne gehri saans li aur bola,
“Ab jo qadam hum uthane ja rahe hain… woh faisla kun hoga.”
Adhara ne hairani se Sikandar ko dekha.
Sikandar ne baat mukammal ki:
“Hum Wesley Atkins se milne ja rahe hain.”
---
Isi dauran…
Shehar ke aik mehnge hotel ke andar aik khufia meeting chal rahi thi.
Hall ke beech sirf aik table tha. Table ke dono taraf do log baithe thay, aur unke peechay do do guards kharay thay.
Agar Sikandar yahan hota, to woh foran pehchan leta ke table par baitha shakhs Duncan hai.
Duncan ke samne aik sunehri baalon wali aurat baithi thi—
Laal libaas pehne hue, seene par Hellcat ka crest chamak raha tha.
Uski aankhon mein nafrat aur bechaini saaf nazar aa rahi thi.
Yeh aurat Sullivan Family ki sarbarah thi—
Wohi family jis ne Duncan ko Red Wing diya tha.
Duncan, is ke bilkul baraks, muskuraye ja raha tha.
Usne cheekh kar muskurate hue Diana ki taraf dekha:
“Ab bhi Red Wing wapas lene ki zid par ho, Diana?”
Diana ne gusse mein apne hont kaat liye.
Uski aankhon mein Duncan ke liye sakht nafrat thi.
Sullivan Family ne Platchi Family ke business ko tabah karne ki har mumkin koshish ki thi,
lekin Rank 25 aur Rank 26 family ke darmiyan jo faasla tha, woh bohot zyada tha.
Duncan ke paas us se lagbhag dugna Awakened power thi.
Diana har qadam par gher li gayi thi.
Family war ke chand hafton mein, Sullivan ne Ratmawati City mein
Platchi ke 11 cash stashes tabah kar diye thay.
Is se Platchi ko 40 million dollars ka nuqsaan hua.
Lekin phir…
Duncan ne khel band kar diya.
Usne jawabi hamla kiya.
Platchi Family ne un logon ko apni taraf kar liya jo pehle Sullivan ke liye
battle equipment banaya karte thay—
yeh recruitment kam aur dhamki zyada thi.
Natija yeh nikla ke Sullivan ka business dheere dheere
Platchi ke qabze mein chala gaya.
Duncan ke paas Sullivan ke baare mein maloomat bohot zyada thi,
jabke Diana ke paas Platchi ke khilaf kuch khaas nahi tha.
Agar Sullivan ka spy zinda hota—
agar Sikandar ne use qatal na kiya hota—
to shayad Diana ko itni buri shikast na hoti.
Aakhirkaar, Diana ne dard bhari awaaz mein kaha:
“Main Red Wing wapas nahi loongi…
lekin hum is par baat-cheet kar sakte hain.”
Yeh alfaaz uske liye zehar peene jaisay thay,
lekin apni family ko bachane ka yehi aik raasta tha.
Duncan muskura diya.
“Mujhe apne nuqsaan ka muawza chahiye,”
“Aur apne bete ke qatl ka maamla yahin dafan kar do.”
“Agar maan liya, to main apne log foran wapas bula loon ga.”
Yeh sunte hi Diana ka khoon khol utha.
Sullivan ke tamam afraad ke chehray syaah par gaye.
Yeh jang Chris ke qatl ki wajah se shuru hui thi,
aur ab un se kaha ja raha tha ke muawza bhi dein
aur apne waaris ki maut bhi bhool jayein.
Mahol aur zyada garam ho gaya.
“Kya tum mera mazaaq uda rahe ho?”
Diana ki awaaz kaanp rahi thi.
Duncan hans para.
“Tum is qabil hi nahi ho ke shartein rakho,”
“Ya to maan lo… ya phir apni family ko aur bikharte hue dekho.”
Diana ne daant bheench kar kaha:
“Tumhara doosra beta… uska aik bazu mujhe chahiye.”
Duncan ne beparwahi se kandhay uchka diye.
“Phir lagta hai yeh meeting yahin khatam hoti hai.”
BRAK!
Diana gusse se uth khari hui aur Duncan ki taraf ungli uthai:
“Laanat ho tum par, Duncan!”
“Ya to hum sab mar jayein, ya phir hum aakhri dam tak tum se badla lein ge!”
Yeh keh kar woh aur Sullivan ke afraad wahan se nikal gaye.
CRACK!
Diana ne darwaza itni zor se khola ke woh toot gaya.
Uska gussa poore corridor mein mehsoos ho raha tha.
Platchi Family ke afraad hansne lagay.
Woh jeet chuke thay.
Aur apne dushman ko itna be-bas dekh kar unhein maze aa rahe thay—
khaaskar Duncan ko.
Duncan kursi par tik kar muskurata raha.
Lekin achanak…
aik aadmi hall mein dakhil hua.
Darwazay ki toot-phoot dekh kar woh ruk gaya.
Uske haath mein kala bag tha.
Woh ladkharaata hua Duncan ke paas aaya.
Duncan ne uske ghabraye chehray ko dekh kar poocha:
“Itni jaldi kyun ho?”
“Maaf kijiye, President,”
“Yeh humein hamari aik market ke samne mila.”
Us aadmi ne bag Duncan ke qadam ke paas rakh diya
aur nazar jhukaye peechay hat gaya.
Duncan ke chehray par shikan aa gayi.
Usay bag se uthti hui buri paish-goi mehsoos ho rahi thi.
Usne apne aik aadmi ko ishara kiya.
Bag khola gaya…
Aur aglay hi lamhay—
Duncan ki saans atak gayi.
Sar thora sa gal chuka tha,
lekin pehchan bilkul wazeh thi.
“LEON!!”
Duncan ki cheekh poore hall mein goonj uthi.
Platchi Family ke afraad ki aankhein phail gayin.
Unke jism surkh roshni se chamakne lagay—
gussa ubal chuka tha.
“YEH KIS NE KIYA?!”
“HUM UNKI POORI FAMILY KA SAR KAAT DENGE!”
“MUJHE IJAZAT DIJIYE, PRESIDENT!”
Duncan ne haath utha kar sab ko chup karwa diya.
Uski muskurahat ghaib ho chuki thi.
Aur uski aankhon mein…
sirf qatal ki aag jal rahi thi.
Duncan ne Leon ka sar uthaya aur use apne qareeb le aaya. Usne ghaur se Leon ke chehre ko dekha, lekin aglay hi lamhay uski aankhen phail gayin jab usne Leon ke sar par likha hua dekha.
BOOM!
Leon ke sar par likhe alfaaz dekh kar Duncan ka aura phat pada. Uski peeth ke peeche aik bhayanak aag ka golem ubhar aaya jo poore mahaul ko daboch raha tha.
Aur sirf itna hi nahi—
Uske baal aik dum jalti hui aag mein tabdeel ho gaye, jis se hararat khatarnaak had tak barh gayi. Uske bazuon par hawa se aag ke vambraces zahir ho gaye, aur uske maathay par aik aag ka nishaan chamak utha.
Is waqt Duncan bilkul bhi insaan jaisa nahi lag raha tha—
woh aik aadmi se zyada aik darinda lag raha tha.
Yeh manzar dekh kar Platchi Family ke tamam afraad peeche hat gaye. Un ke jism Duncan se nikalne wali aag bardasht nahi kar paa rahe thay.
Lekin jaise hi woh sab bahar nikalne lage—
Duncan achanak normal ho gaya.
Usne sab ki taraf dekha aur garajti awaaz mein kaha,
“Sullivan ka hisaab abhi khatam karo. Baad mein hum khud us ka shikaar karein ge. Ab mujhe kisi anjaam ki parwah nahi… mujhe sirf uski maut chahiye!”
“Yes, President!”
sab ne aik saath jawab diya.
Sab log hall se nikal gaye, Duncan ko akela chhor kar.
Duncan ne dobara Leon ke sar par likhe alfaaz dekhe:
‘I Killed Your Son’
Uski aankhon mein junoon bharr gaya.
“Main inteqam loonga… Sikandar!”
---
~
Is waqt Sikandar apni gaari ke andar Adhara ke saath baitha hua tha. Dono Wesley Atkins se milne ke liye apni manzil ki taraf ja rahe thay.
Tab achanak—
<Sudden Quest!>
Revenge Seeking Father
User ne Lucas Platchi ko nihayat berahmi se qatal kiya. Is amal ne aik toote hue baap ke dil mein inteqam ki aag bhadka di hai.
Is maslay ka hal karo—ya to us baap ko qatal karo, warna woh user ko lagataar tang karega aur aakhirkaar user ki maut ka sabab banega.
Quest Reward:
4,000,000 EXP
Heart of Terra
5 Skill Upgrade
Yeh dekh kar Sikandar ke honton par aik muskurahat aa gayi.
“Toh usne sar hasil kar liya…”
uski muskurahat aik khatarnaak grin mein badal gayi.
Quest se hi Sikandar samajh gaya ke yeh Sudden Quest kisi aur ne nahi balkay Duncan Platchi ne shuru ki hai.
Usne Suraj ko Leon ka sar dene ko kaha tha—
aur us par aik extra tohfa bhi chhor diya tha.
Adhara ne Sikandar ke chehre par woh qaatil muskurahat dekhi aur keh uthi,
“Sikandar… tumhara aura phir se qatl ki bhookh se bhara hua hai. Sab kuch laal laal dikh raha hai.”
Sikandar hans diya,
“Control nahi hota… meri ghalti.”
“Achaanak itni qatl ki bhookh kyun? Hum road par hain,”
Adhara hairani se boli.
Usne idhar udhar dekha, lekin koi aisi cheez nazar nahi aayi jo Sikandar ke aura ko bharka sakay.
Sikandar sharaarti muskurahat ke saath bola,
“Bas lagta hai meri aik planning kaam kar gayi… aur mujhe maza aa gaya.”
“Maza?”
Adhara ne dil hi dil mein socha.
“Tum waqai ajeeb ho… kisi ko maarna mujhe sirf bojh lagta hai.”
“Kam az kam mera shauq itna ajeeb nahi… choking qatal se behtar hai.”
---
Raat ki sarkein zyada bhari hui nahi thi. Chand gaariyan aur bikes hi chal rahi thin.
Sikandar ne Wesley Atkins se milne ke liye Sector 3A ka intekhab kiya tha—
jo yahan se takreeban 4 ghantay ki drive par tha.
Din ke waqt hota toh yeh safar teen guna lamba hota.
Wajah yeh thi ke Sikandar Sector 1 se guzar nahi sakta tha—
wahan sirf high-ranking logon ko ijazat hoti hai.
Bina access ke wahan jana namumkin tha.
Is liye use Sector 2 se lamba chakkar lagana par raha tha.
Train se jata toh shayad sirf aik ghanta lagta—
Lekin Sikandar apni gaari ko zyada mehfooz samajhta tha.
Jis jagah par woh Wesley se milne ja rahe thay, woh aik mashhoor beach hotel tha—
sirf elite logon ke liye.
Mehnga, luxury aur tourists ka favourite.
Zahir hai, paisay Atkins Family degi—Sikandar nahi.
---
Safar ke dauran—
Sikandar drive karte hue meditation kar raha tha, apni nayi breathing technique ke saath.
Uski tawajjoh itni strong ho chuki thi ke gaari chalate hue bhi meditation kar sakta tha.
Is tarah woh apna waqt behtareen tareeqay se use karta tha.
“Yeh lo,”
Sikandar ne Adhara ko aik kitab dete hue kaha,
“Ab har raat yeh technique use karna.”
Adhara ne aik hari kitab pakri jo roshni nikal rahi thi.
“Yeh kya hai? Koi spellbook?”
usne poocha.
“Nahi,” Sikandar ne araam se samjhaya,
“Yahi tareeqa hai jis se werewolves strong bante hain. Is se tum Lunar Blessing absorb kar sakogi… aur bohot tezi se taqatwar banogi.”
Yeh sun kar Adhara ki aankhen chamak uthin.
Shayad woh bhi jaldi Rank Five tak pohanch jaye—
bilkul asli werewolves ki tarah.
Usne kitab sambhal kar rakh li,
“Main poori mehnat karungi.”
Thori dair baad Adhara boli,
“Wesley Atkins ke saath tumhara plan bohot zyada brutal hai… kya tumhein logon ko aik doosray ke khilaaf ladwana pasand hai?”
Sikandar hans pada,
“Bas mujh par bharosa rakho. Jab hum kam az kam Rank Six par pohanch jayen ge… hum yahan se nikal kar Supernatural territory mein apni fatah shuru karen ge.”
“Tumhein waqai yeh sab pasand hai,”
Adhara ne sar hila kar kaha.
Sikandar ne halki si muskurahat ke saath kaha,
“Shayad…”
Phir uski aankhon mein gehra irada ubhra.
“Karan Silverstar Pack ka hissa hai… aur uski ghalti hamari ghalti hai.”
“Jo bhi hamare pack ko dhamki dega…”
Uski muskurahat khatarnaak ho gayi.
“Woh jahanam mai jaye gah.”
Adhara ne use hairani se dekha.
Sikandar ne aakhri alfaaz kaha:
“Hum chhupte hain…
hum scout karte hain…
aur phir—
sab ka safaya.”
---
Aaj ke liye itnah hi. I hope ye episode be aap sub ko pasind ahye gah.
Likes target same 50.
Next update se kuch bahtr shoron gah. Aur fight be kafi ahne wali.
Mai be kuch din se busy tha. Is liye zayada deyan nahi diya story par.
Apne suggestions zaror dena aur comments kar ke. Apne reviews be.
Milte hai next episode mai tab take ke liye.
Thanks and Bye
