Update: 4 - B
Episode: 4/B
Muhaidda (Zhaer'Vaal)
Zhaarin ki Saltanat
Vaelan ko is baat ka bilkul andaza na tha ke jis panje ke nishan ko dekh kar uske dil mein sawal paida hua tha...
Usi waqt...
Aerun...
Sone ka Pahaarh.
Insani sarzameen se kai sau kos door.
Buland paharon ke us paar...
Badalon se bhi oonchi chotiyon ke darmiyan...
Zhaarin ki asal duniya basi hui thi.
Ye koi andheri ghufaon ki basti na thi.
Balke ek aisi saltanat thi jise dekh kar insaan ki soch bhi chhoti lagti.
Paharon ki chotiyan sunehri dhaaton se chamak rahi thin.
Nadiyon ka pani sheeshe ki tarah saaf tha.
Kuch darakht aise thay jin ke pattay noor ki maanind halki roshni bikherte thay.
Kahin hawa mein tairte hue sang-e-marmar ke mahal thay.
Kahin aasman se girte noor ke chashme.
Aur kahin itni wasee kutub khane ke unki inteha nazar na aati.
Yahan daulat sirf sona ya jawahraat nahi thi.
Asal daulat...
Ilm tha.
Purane asraar thay.
Tilismi funoon thay.
Aur woh hikmat jo insano ne kabhi dekhi hi na thi.
Isi azeem saltanat ke markaz mein ek shandaar mahal tha.
Uska naam tha...
Vael'Razaan.
Yahan har bade Zhaarin qabeelay ka sardaar bulaya gaya tha.
Aaj ki majlis aam na thi.
Sadiyon baad tamam qabeelon ka ijlaas bulaya gaya tha.
Ek ek kar ke sardaar mahal ke wasee darbar mein dakhil hone lage.
Sab se pehle aaye...
Vel'Zhaarin.
Safed libaas.
Safed baal.
Sunehri aankhen.
Chehre par sakoon.
Ye ilm aur hikmat ke muhafiz thay.
Inke mahal duniya bhar ki zinda libraries ke liye mashhoor thay.
Unke baad aaye...
Xer'Zhaarin.
Surkh zireh.
Aag ki maanind chamakti aankhen.
Mazboot jism.
Ye jang ke ustad aur aatishi funoon ke maahir thay.
Phir darya ki gehrayiyon se nikle...
Veya'Zhaarin.
Neeli aankhen.
Neelay libaas.
Inke baare mein mashhoor tha ke ye zakhmon ko bhar dete hain aur zehr ko pani ki tarah dho dete hain.
Sab se aakhir mein...
Khamoshi se...
Krynn'Zhaarin darbar mein dakhil hue.
Unke libaas siyah thay.
Chehre pur-sukoon.
Lekin aankhon ki gehrayi mein kuch chhupa hua mehsoos hota tha.
Unmein se ek...
Kharuz bhi tha.
Chehre par adab.
Dil mein kuch aur.
Magar uska raaz kisi ko maloom na tha.
Darbar ke tamam darwaze band kar diye gaye.
Khamoshi chha gayi.
Tabhi...
Darbar ke darmiyan ek buzurg shakhs aahista aage badha.
Uski umr ka andaza lagana namumkin tha.
Lambi safed dhaari.
Sunehri aankhen.
Mathe par waqt ki lakeerein.
Ye thay...
Vaezhar.
Laqab...
Rakhwala-e-Raaz.
Ek aisi hasti jisne Azrakh ko us waqt bhi dekha tha...
Jab woh gumraah na hua tha.
Poore darbar ke tamam sardaron ne adab se sar jhuka diye.
Vaezhar ne dheemi lekin goonjti hui awaaz mein kaha,
"Zhaer'Vaal..."
"Hamare buzurgon ki sab se muqaddas qasam hai."
"Koi bhi Zhaarin insano ki sarzameen par qadam nahi rakhega."
"Koi bhi insaan hamari hudood paar nahi karega."
"Isi muhaidde ne hazaron saal aman qaim rakha."
Darbar khamosh tha.
Vaezhar ne sab ki aankhon mein dekha.
Phir uski awaaz aur sakht ho gayi.
"Lekin..."
"Mujhe shak hai..."
"Kisi ne..."
"Is muhaidde ko toda hai."
Darbar mein halki si sargoshi phail gayi.
Kisi ne hairani se ek doosre ko dekha.
Kisi ne be-yaqeeni se.
Lekin Kharuz...
Khamosh khada raha.
Uske chehre par koi asar na tha.
Vaezhar ne apna asa zameen par mara.
Poora hall goonj utha.
"Agar meri baat sach hui..."
"To mujrim ko main apni aankhon ke saamne dekhna chahta hun."
"Chahe woh kisi bhi qabeelay ka ho."
"Usay sakht se sakht saza di jayegi."
Ye alfaaz sunkar tamam sardaron ne sar jhuka diye.
Sirf Kharuz ki aankhon mein ek pal ke liye ajeeb si chamak ubhri...
Magar agle hi lamhe woh gayab ho gayi.
Usne dil hi dil mein socha,
"Ab waqt kam hai..."
"Or'Krynn ko jaldi phailana hoga."
Chhupa hua fitna...
Ab dheere dheere saans lena shuru kar chuka tha.
Aur kisi ko is baat ka ehsaas bhi na tha.
----
Dhoop dheere dheere maghrib ki taraf jhuk rahi thi.
Jungle ke ghane darakhton ke darmiyan se nikalti sunehri kirnein zameen par bikhri hui thin.
Vaelan ne ek aakhri martaba us jagah ki taraf dekha jahan use Zhaarin ke panjon ke nishaan mile thay.
Usne dil hi dil mein faisla kiya.
"Jab tak yaqeen na ho... main kisi ko kuch nahi bataunga."
Woh ghore par sawar hua aur doston ki taraf rawana ho gaya.
---
Thodi der baad...
Kael Varun door se hi cheekha,
"Lo ji... shahenshah tashreef le aaye!"...
"Hum samjhe the hiran ne tumhein apna rishtedaar bana liya."
Rhyas Thaal hans pada.
"Mujhe to lagta hai Vaelan jungle mein bhi kitaab dhoondhne lag gaya hoga."
Vaelan muskura diya.
"Na hiran mila..."
"Na kitaab."
"Bas tum logon se door do pal ki sukoon mil gayi."
Kael ne foran jawab diya,
"Yeh jhoot itminaan se bol diya tumne."
"Agar sukoon mil gaya hota to wapas hi na aate."
Sab zor se hans pade.
Zyren Vaelor ne Vaelan ke chehre ko ghour se dekha.
Usay mehsoos hua...
Vaelan ke zehan mein kuch chal raha hai.
Magar usne kuch poocha nahi.
Woh jaanta tha...
Jab Vaelan ko munasib lagega, woh khud bata dega.
---
Shikaar ka samaan ghodon par baandh diya gaya.
Do hiran.
Kai jangli parinde.
Aur kuch khargosh.
Kael ne fakhr se kaha,
"Aaj ki dawat yaad rakhi jayegi."
Rhyas ne muskurakar kaha,
"Bas ye mat kehna ke aadha shikaar tumne akelay kiya."
Kael ne foran kaha,
"Agar main na hota to tum log bhooke laut rahe hote."
Vaelan ne hans kar kaha,
"Kael..."
"Khud ki tareef karne mein tumhara koi muqabla nahi."
"Tumhein is fun ka ustad maan lena chahiye."
Phir ek baar qehqahay jungle mein goonj uthe.
---
Maghrib se pehle...
Ruuneth Qila ke buland burj nazar aane lage.
Darwazon par pehredaar khade thay.
Jaise hi chaaron andar dakhil hue...
Sipahiyon ne adab se sar jhuka diya.
Qile ke naukar foran shikaar utarne lage.
Kael ne fakhr se kaha,
"Dekho... aaj bhi sab se zyada shikaar mera hai."
Ek buzurg bawarchi ne muskurakar hiran dekha aur bola,
"Janab..."
"Is par to Vaelan ka teer laga hua hai."
Kael ek lamhe ke liye chup ho gaya.
Phir bola,
"Mera matlab tha..."
"Sab se zyada mashwara mera tha."
Rhyas aur Vaelan phir hans pade.
---
Shaam dhal chuki thi.
Naeryya anaaj ki taqseem se farigh hokar mahal ke andar aa chuki thi.
Vaelan ne use dekhte hi muskurakar salaam kiya.
"Aelun."
Naeryya ke labon par bhi muskurahat aa gayi.
"Aelun."
"Tum log ka shikaar kaisa raha?"
Kael foran beech mein bol pada,
"Bas itna samajh lo..."
"Agar main chahta to aaj poora jungle khaali kar deta."
Naeryya hans padi.
"Lekin tumne rehmat kar di?"
Kael ne seena tan kar kaha,
"Bilkul."
Vaelan ne dheemi awaaz mein kaha,
"Iski baaton par dehan mat do warna isne bato se hi sab ka pait bhar dena hai." Or muskura diya
Naeryya ki hansi aur gehri ho gayi.
---
Ruuneth Qila mein raat ka waqt tha.
Mahal ke andar roshni ke diye jagmaga rahe thay.
Aaj ka din aam dinon jaisa nahi tha.
Aaj shikaar se wapsi hui thi.
Aur Ruuneth ki riwayat thi ke jo shikaar qile ke jangju apni mehnat se hasil kar ke laayein...
Uska pehla hissa qile ke buzurgon, mehmanon aur ghar walon ke saath baant kar khaya jata tha.
Bara sa Dastarkhuwan Ka Saij sajaya gaya tha.
Ye ek wasee hall tha jahan qile ke bade faisle bhi hote thay aur khushi ke mauqe bhi manaye jate thay.
Lambi mezon par rang birange khane saje hue thay.
Hiran ka bhuna hua gosht.
parindon ke lazeez pakwan.
Gandum ki rotiyan.
Phalon se tayyar ki gayi mukhtalif mashroobat.
Baaghon ke angoor, anar aur saib se bani hui meethi mashroobat.
Aur garam garam shorbe jin ki khushboo poore hall mein phail rahi thi.
Vaelora Elyra ek taraf aur Naeryya doosri taraf baithi thi.
Thoryor Azel Ruun apne bete Vaelan ke saath mez ke siray par maujood thy.
Vaelan ke teenon dost bhi qareeb hi baithe thay.
Kael Varun ne apni plate bharte hue fakhr se kaha,
"Main aaj bhi kehta hun..."
"Agar mera teer na hota to ye dawat adhoori hoti."
Rhyas Thaal ne foran kaha,
"Tumhara teer to ek parinde ke peeche teen baar gaya tha."
Kael ne hairani se dekha.
"Usay tum meri hikmat keho."
"Hawa ka rukh samajh raha tha."
Zyren Vaelor muskuraya.
"Hawa ka rukh ya apna nishana?"
Kael ne foran jawab diya,
"Dono."
Vaelan hans pada.
"Kael, tumhari sab se badi khoobi ye hai ke tum haar kar bhi, jeet ka sabab dhoond lete ho."
Poora mez qehqahon se goonj utha.
Kael ne nakhre se kaha,
"Ek din tum sab meri tareef karoge."
Rhyas ne kaha,
"Wo din bhi shayad tab aaye jab tum sach bol do."
---
Kuch der tak khana, baatein aur hansi mazak chalta raha.
Phir Vaelan ka chehra sanjeeda hone laga.
Usne apne walid ki taraf dekha.
"Mere Thoryor..."
Azel Ruun ne uski taraf tawajjah di.
"Kya baat hai?"
Vaelan ne apni jeb se ek chhoti si kapde ki potli nikali.
Vaelan k dosto ki nazrein bhi us par jam gayin.
Vaelan ne potli kholi.
Andar se ek siyah rang ka resha nikala.
Phir usne zameen par bana hua nishaan ka naqsha bhi saamne rakha.
Zyren Vaelor foran seedha ho kar baith gaya.
"Ye kya hai?"
Vaelan ne dheemi awaaz mein kaha,
"Aaj shikaar ke dauran..."
"Jungle ke us hisse mein jahan aam tor par koi nahi jata..."
"Mujhe ye nishaan mile."
Usne naqsha khola.
"Ye kisi janwar ka aam panja nahi tha."
"Ye bohot bada tha."
"Ungliyon ki shakal..."
"Aur gehraai..."
"Ye kisi aisi makhlooq ka tha jise humne yahan sadiyon se nahi dekha."
Thodi der khamoshi chha gayi.
Azel Ruun ne naqshay ko ghour se dekha.
"Kya tum samajhte ho..."
"Ke ye Zhaarin ka nishaan ho sakta hai?"
Vaelan ne foran jawab nahi diya.
"Main yaqeen se nahi keh sakta."
"Lekin Zhaer'Vaal ke baad..."
"Unka hamari sarzameen par aana mumkin nahi hona chahiye."
Zyren ne woh siyah resha uthaya.
Uski aankhon mein tajassus tha.
"Ye aam jism ka hissa nahi lagta."
"Is par ajeeb si bunawat hai."
Vaelan ne uski taraf dekha.
"Main bhi isi liye ise laya."
"Main andaza nahi lagana chahta."
"Main sach dhoondna chahta hun."
Azel Ruun kuch lamhe khamosh raha.
Phir muskuraya.
"Isi wajah se tumhara naam Vaelan hai."
"Sach dhundne wala."
"Lekin yaad rakho..."
"Har sach ko foran duniya ke saamne nahi laya jata."
"Kuch sach pehle samjhe jate hain."
Vaelan ne sar jhuka kar kaha,
"Main samajh gaya, Mere Thoryor."
---
Naeryya door se sab dekh rahi thi.
Usay maloom nahi hoa par usne kuch chizon ka andaza lagaya tha...
Vaelan Reshe or nishaan ko dekh k kuch sochne lagta
Vaelan ke liye ye sirf ek nishaan nahi tha.
Ye ek naye safar ka aghaaz.
Aur shayad...
Ruuneth ke bahar chhupi hui duniya ka pehla raaz or darwaza bhi.
---
Zhaarin ki azeem majlis khatam hone ke baad bhi mahal ki fiza bojhal thi.
Aaj sadiyon purana Zhaer'Vaal Muqaddas Muhaidda pehli baar khatre mein mehsoos ho raha tha.
Har sardaar apne apne qabeelay ki taraf rawana hone laga.
Magar ek shakhs tha...
Jo doosron ke saath na gaya.
Kharuz.
Usne aas paas nazar daali.
Yaqeen kar liya ke koi uska peecha nahi kar raha.
Phir woh mahal ke pichhle hisse ki taraf chal diya.
Wahan ek tang si pathriili raah pahaar ke andar jaati thi.
Andhera itna gehra tha ke chand ki roshni bhi us mein daakhil na ho sakti thi.
Kharuz us raaste par kaafi der tak chalta raha.
Aakhir ek purani ghufa ke saamne ruk gaya.
Usne dheemi awaaz mein kaha,
"Vaer'thal..."
(Khoon ki qasam.)
Ghufa ki deewar par bane purane nishaan halki si surkh roshni se chamak uthe.
Pathar ka darwaza aahista aahista khul gaya.
Andar sirf ek mashaal jal rahi thi.
Uski lau hil rahi thi...
Jaise hawa ke baghair bhi koi saans le raha ho.
Kharuz ghutnon ke bal baith gaya.
Kuch hi lamhon baad...
Sannate mein se ek saaya saamne aaya.
Uska chehra dikhayi nahi deta tha, ankhy siyah se chamak rahe thy, naqab mein chhupa hua tha.
Na uski shakal nazar aati thi...
Bus uski siya aankhen.
Sirf awaaz.
"Vaezhar ko shak ho gaya?"
Kharuz ne sar jhuka kar jawab diya.
"Ji."
"Lekin sirf shak."
"Saboot abhi nahi hai us ke paas."
Siya Saaye ne dheemi hansi hansi.
"Achha hai."
"Shak se log sawal karte hain..."
"Saboot se jung shuru hoti hai."
Kharuz ne poocha,
"Thoryn ka kya haal hai?"
Siya saaye ne jawab diya,
"Woh apna kaam kar raha hai."
"Insaanon ke dil badalna talwar se b zyada aasaan hota hai."
"Bas unki zaroorat badal do."
Kharuz ki aankhon mein tasalli ubhri.
"Or'Krynn..."
"Khamoshi se phail raha hai."
Siya saaye ne haath utha kar use roka.
"Nahi."
"Ab sirf Rizaan se door rakhna kaafi nahi."
"Ab unka yaqeen bhi todna hai."
"Jab yaqeen toot jata hai..."
"To nizaam apne aap gir jata hai."
Ghufa mein phir khamoshi chha gayi.
kar gya, 
,,,, keep it up, likhte raho,