Chauraha
Chand Shabd
Aksar hum sabhi behtar jiwan ki talaash me palayan karte hai ek nirjan sthaan se sambhavnao aur smridhi se bhare us jungle ki aur jis taraf swayam-sukh aur laalsa se bhare ekmatra banjare hum he nahi hote. Har insaan yahi aas aur soch rakhta hai ki uska jiwan kabhi toh saral aur smridh bane. Kaash ki prakriti ka ye anootha jeev baaki sabhi prajaatiyon ke samkaksh soch rakhta aur suryodaya-suryaast jiwan me yakeen rakhta. Shayad kahi na kahi galti kudrat ki bhi hogi jisne insaan me ek atirikt tatva mila diya isko banate hue. Itchhaayen.. Insaan janam lete he duniya se ru-ba-ru hota hai toh uske saral nirmal chitt me sabse pehli milawat panapti hai toh wo hoti hai itchhaayen. Aakhir kya hai ye itchhaayen jisne prakriti ke saamne ghutno par rengne wale vann-maanush ko aaj usi prakriti ko chunoti dene wala kaal bana diya?
Iske baare me ek pankti me toh kya he kaha ja sakta hai kyonki na itchha ki saral paribhasha hai aur na he iska koyi antim chhor. Par kuch aur bhi tha jo manushya janam ke samay toh na jaan saka lekin tha 'wo' uske he bhitar, bahot gehraai me jis se navjaat abodh toh waakif bhi nahi tha par usko bhaan hua jaise jaise wo navjaat se tarun aur fir kishor bana. Umar ke badhne ke sath wo gehraai me daba ankur bhi badh kar kishor vriksh bana jo insaan ko uski paridhi me qaid karne ke liye prakriti ka he dusra tatva tha... Darr. Itchhayen badhti hai toh ye dusra swaroop bhi uske samaan badhta hai aur santulan ka toh yahi niyam hai ki taraaju ke palade samaan rahe. Anantkaal se ye dono insaan ke mann mastishk me shaamil rahe hai aur aaj bhi ye wahi vyaapt hai.
Aaj wahi badlaav bhara vann-maanush insaani roop dhaaran kiye, mann me anginat itchhaon aur darr ke sath prakritik jungle se nikal kar sirf apni ek alag duniya banane ja raha hai. Sansadhano ke naam par uske paas 2 kadam, ek vastra aur bas disha hai us us kendra ki jaha ummeedo ki uski alag duniya basegi. Waise raah sirf us ekmatra insaan ki toh nahi hai jaise 4 dishaayen hoti hai waise 4 alag insaan aur unki 4 raahen jo ek samaan kendra par jab ek dusri se judti hai toh wo kendra kehlata hai 'Chauraha'. Manushya ko smridhi ke raah par khinchne wala, jisme itchhaon ki purti shamil hai ya sirf ek chhalava par yakinan waha Darr toh shaamil hai. Chaar taraf se ek kendra par jama hone wale aadhunik vann-maanusho ke beech pratispardha ka darr, itchhaon ke takraav ka darr lekin inse badhkar hai wo ujle safar se yaha tak pahuchne par andhkaar ka darr. Wo darr jis se aksar chaurahe anginat jiwan ka kaal bante rahe aur aaj bhi bann rahe hai. Andhkaar bhara wo chuaraha kiski upaj hai? Insaan ya Prakriti? Jawaab ki taalash bhi toh ek itchha he hai aur itchha ke sath milne wala jokhim nishulk. Toh kyun na ek baar safar kar he liya jaayen apne ekaki sthaan se us smridh aadhunik jungle ka jaha vriksho se adhik maidaan aur imaarte hai. Jaha prajaati ke naam par sirf manushya aur uske bandhak wo jeev jinhe usne apni jarurat ka naam de kar paaltu bana liya. Dekhte hai din me chehal-pehal se bhara wo chauraha kyun andhkaar me kaal bann jata hai. Bas karna itna hai agar koyi sath chalne ko tayaar ho.. Kursi ki petiyaan bandh lijiye, chauraahe ki taraf jaane wali udaan jald he shuru hone wali hai. Gantavya- Graam: Paatan, Varsh-1910. 52 gharo wala ek aisa gaanv 13-13 ke hisaab se 4 hisso me banta hai aur unke hisse karta hai 'Chauraha'
